പള്ളി​ത്തോട്ടം പൊലീസി​നു നേരെ അക്രമം, രണ്ട് ഉദ്യോഗസ്ഥർക്ക് പരി​ക്ക്

കൊല്ലം: മയക്കുമരുന്ന് ഉപയോഗം അന്വേഷിക്കാനെത്തിയ പൊലീസ് ഉദ്യോഗസ്ഥരെ ആക്രമിച്ച നാലു യുവാക്കൾ പിടിയിൽ. പള്ളിത്തോട്ടം സ്റ്റേഷനിലെ പോലീസ് ഉദ്യോഗസ്ഥർക്കാണ് മദ്യപസംഘത്തിന്റെ ആക്രമണത്തിൽ പരിക്കേറ്റത്. ഗ്രേഡ് എസ്.ഐ രാജീവ്, എ.എസ്.ഐ ശ്രീജിത്ത് എന്നി​വരെ ജി​ല്ലാ ആശുപത്രി​യി​ൽ പ്രവേശി​പ്പി​ച്ചു. തലയ്ക്ക് സാരമായി പരിക്കേറ്റ രാജീവിനെ പി​ന്നീട് സ്വകാര്യ ആശുപത്രിയിലേക്ക് മാറ്റി.

ഇന്നലെ വൈകിട്ട് ആറോടെയാണ് സംഭവം. കൊല്ലം പോർട്ട് ഭാഗത്ത് ലഹരി ഉപയോഗം കൂടുന്നുവെന്ന വിവരത്തിന്റെ അടിസ്ഥാനത്തിൽ അന്വേഷിക്കാനെത്തിയ പൊലീസുകാർ സ്ഥലത്ത് മദ്യപിച്ചിരുന്ന സംഘത്തെ ചോദ്യം ചെയ്യുന്നതി​നി​ടെ പ്രകോപിതരായ യുവാക്കൾ ഇവരെ ആക്രമിക്കുകയായിരുന്നു. അക്രമി​ സംഘത്തിലെ മനു, വിമൽ, സഞ്ജയ്, ടോജിൻ എന്നിവരെ പൊലീസ് അറസ്റ്റ് ചെയ്തു. ഒപ്പമുണ്ടായിരുന്ന രണ്ടുപേർ ഓടി രക്ഷപ്പെട്ടു. ഇവർക്കായി അന്വേഷണം ആരംഭിച്ചിട്ടുണ്ട്.