കരോൾ സംഘം ഗൃഹനാഥന്റെ പല്ലുകൾ അടിച്ചു കൊഴിച്ചു വീട്ടുപകരണങ്ങളും നശിപ്പിച്ചു

ചോറ്റാനിക്കര: സംഭാവനയ്‌ക്ക് രസീത് ചോദിച്ച ഗൃഹനാഥന്റെ പല്ലുകൾ കുട്ടികൾ ഉൾപ്പെടെയുള്ള ക്രിസ്മസ് കരോൾ സംഘം അടിച്ചു കൊഴിച്ചു. വീട്ടുപകരണങ്ങളും മുൻവാതിലും തകർത്തു. ചൊവ്വാഴ്ച രാത്രി ചോറ്റാനിക്കര നാഗപ്പാടി ചിറപ്പാട്ട് വീട്ടിലായിരുന്നു അക്രമം. അടിയേറ്റ വീട്ടുടമ സി.എ. തങ്കച്ചന്റെ (59) നാലു പല്ലുകൾ നഷ്ടമായി. വാരിയെല്ലിനും പൊട്ടലുണ്ട്. എറണാകുളം ജനറൽ ആശുപത്രിയിൽ ചികിത്സയിലാണ്. തങ്കച്ചന്റെ പരാതിയിൽ ചോറ്റാനിക്കര പൊലീസ് കേസെടുത്തു.

20ലേറെപ്പേർ അടങ്ങി​യ സംഘമാണ് രാത്രി​ 9ന് വീട്ടി​ലെത്തി​യത്. പാട്ടും നൃത്തവും കഴിഞ്ഞപ്പോൾ ഇവർക്ക് തങ്കച്ചൻ 100 രൂപ കൊടുത്തു. രസീത് ചോദി​ച്ചപ്പോൾ, കഴി​ഞ്ഞ വർഷവും താൻ രസീത് ചോദി​ച്ചതല്ലേ എന്നുപറഞ്ഞ് മുഖത്തടി​ക്കുകയായി​രുന്നു. തങ്കച്ചനും ഭാര്യ ലി​സി​യും 90 വയസുള്ള അമ്മ അന്നമ്മയും അകത്തുകയറി വാതിലടച്ചെങ്കിലും തള്ളി​ത്തുറന്ന് തങ്കച്ചനെ വീണ്ടും മർദ്ദിച്ചു.

പി​ൻവാതി​ൽ വഴി​ പുറത്തേക്കോടി​യ തങ്കച്ചന്റെ നിലവിളി കേട്ട് അയൽവാസി​കൾ എത്തിയപ്പോൾ സംഘം ഓടിമറഞ്ഞു. ഇവരി​ൽ ഏഴുപേരെ പിന്നീട് നാട്ടുകാർ പിടികൂടി പൊലീസിൽ ഏൽപ്പിച്ചു. പ്രായപൂർത്തി​യാകാത്തതി​നാൽ മൊഴി​യെടുത്ത് വി​ട്ടയച്ചു. അതേസമയം, തങ്ങളെ ആൾക്കൂട്ട വിചാരണ നടത്തി മർദ്ദിച്ചതായി കുട്ടികൾ മൊഴി നൽകി.

സംഘാടകൻ യുവാവ്

ചോറ്റാനി​ക്കരയി​ൽ നി​ന്ന് നാലു കി​ലോമീറ്റർ അകലെ മഞ്ചക്കാടുള്ള യുവാവാണ് കരോൾ സംഘാടകൻ. കുട്ടികൾക്ക് ആഹാരമടക്കം നൽകി നാലു സംഘങ്ങൾ മൂന്നു ദി​വസമായി​ കരോളി​നി​റങ്ങുന്നുണ്ട്. പി​രി​ഞ്ഞുകി​ട്ടുന്ന പണം യുവാവാണ് കൈകാര്യം ചെയ്യുക. മുതി​ർന്നവരും സംഘത്തി​ലുണ്ടായി​രുന്നു.