സർക്കാർ നിർദേശങ്ങൾക്ക് പുല്ലുവില,​ മകളുടെ വിവാഹം ആഘോഷമായി നടത്തി മുസ്ലീംലീഗ് നേതാവ്: കൊറോണ നിരീക്ഷണത്തിലുള്ള മകനും പങ്കെടുത്തു,​ കേസെടുത്ത് പൊലീസ്

കോഴിക്കോട്: കൊറോണ വെെറസ് വ്യാപകമാകുന്ന പശ്ചാത്തലത്തിൽ സർക്കാർ നിർദേശങ്ങൾ ലംഘിച്ച് മുംസ്ലീം ലീഗ് നേതാവിന്റെ മകളുടെ വിവാഹം. മകൻ കൊറോണ നിരീക്ഷണത്തിലിരിക്കെയാണ് നേതാവ് മകളുടെ വിവാഹം നടത്തിയതെന്നാണ് പരാതി. മുസ്ലിം ലീഗിന്റെ പോഷക സംഘടനയായ വനിതാ ലീഗിന്റെ അഖിലേന്ത്യാ ജനറൽ സെക്രട്ടറിയും മുൻ വനിതാ കമ്മിഷൻ അംഗവുമായ അഡ്വ. നൂർബീന റഷീദിനെതിരെയാണ് ആരോഗ്യവകുപ്പ് പരാതി നൽകിയത്. സംഭവത്തിൽ ചേവായൂർ പൊലീസ് കേസെടുത്തു.

കൊറോണ നിരീക്ഷണത്തിലിരിക്കുന്ന മകനുൾപ്പടെ മകളുടെ വിവാഹത്തിൽ പങ്കെടുക്കുകയും ചെയ്തുവത്രെ. ഈ മാസം 14ന് അമേരിക്കയിൽ നിന്നെത്തിയ മകളുടെ വിവാഹമാണ് 21ന് നൂർബീന റഷീദിന്റെ വീട്ടിൽ വച്ച് തന്നെ ആഘോഷമായി നടത്തിയത്. ചടങ്ങിൽ 50 ൽ അധികം ആളുകൾ പങ്കെടുക്കരുതെന്ന സർക്കാർ നിർദ്ദേശവും ലംഘിക്കപ്പെട്ടുവെന്നാണ് ആരോഗ്യവകുപ്പിന്റെ കണ്ടെത്തൽ.