ഷിംല: ഹിമാചൽ പ്രദേശിലേക്ക് പ്രവേശിക്കാൻ പ്രമുഖ വ്യക്തികളുടെ പേരിൽ വ്യാജ ഇ– പാസ് നേടിയവർക്കെതിരെ പൊലീസ് കേസെടുത്തു. മുൻ യു.എസ് പ്രസിഡന്റ് ഡോണാൾഡ് ട്രംപ്, ബോളിവുഡ് താരം അമിതാഭ് ബച്ചൻ എന്നിവരുടെ പേരിലുള്ള വ്യാജ ഇ – പാസുകളാണ് പൊലീസ് കണ്ടെടുത്തത്. ഇത് കൈവശപ്പെടുത്തിയവർക്കെതിരെ എഫ്‌.ഐ.ആർ രജിസ്റ്റർ ചെയ്തതായി ഷിംല പൊലീസ് അറിയിച്ചു.

കൊവിഡ് കേസുകൾ വർദ്ധിച്ച സാഹചര്യത്തിൽ ഹിമാചൽ പ്രദേശിലേക്ക് പ്രവേശിക്കണമെങ്കിൽ ഇ-പാസ് നിർബന്ധമാക്കിയിരുന്നു. എന്നാൽ വ്യാജവിവരങ്ങൾ നൽകി പലരും പാസ് നേടുകയായിരുന്നു. ട്രംപിന്റെയും അമിതാഭ് ബച്ചന്റെയും പേരിൽ സ്വന്തമാക്കിയിരിക്കുന്ന രണ്ട് ഇ- പാസിലും ഒരേ മൊബൈൽ നമ്പരും ആധാർ നമ്പരുമാണ് നൽകിയിരിക്കുന്നത്. ഇത് ശ്രദ്ധയിൽപ്പെട്ടതോടെ ഐ.ടി വിഭാഗം പൊലീസിനു പരാതി നൽകി. തുടർന്നാണ് എഫ്‌.ഐ.ആർ കജിസ്റ്റർ ചെയ്ത് അന്വേഷണം ആരംഭിച്ചത്.