മുംബയ്: റിലയൻസ് ഇൻഡസ്‌ട്രീസ് ചെയർമാനും ഏഷ്യയിലെ ഏറ്റവും സമ്പന്നനുമായ മുകേഷ് അംബാനിയുടെ ആസ്‌തി 10,000 കോടി ഡോളറിലേക്ക് (സുമാർ 7.30 ലക്ഷം കോടി രൂപ). 9,260 കോടി ഡോളറാണ് (6.76 ലക്ഷം കോടി രൂപ) നിലവിൽ അദ്ദേഹത്തിന്റെ ആസ്‌തി. സെൻസെക്‌സിൽ റിലയൻസ് ഇൻഡസ്‌ട്രീസിന്റെ ഓഹരിക്കുതിപ്പിന്റെ പിൻബലത്തിൽ കഴിഞ്ഞ വെള്ളിയാഴ്‌ച മാത്രം മുകേഷിന്റെ ആസ്‌തിയിൽ 370 കോടി ഡോളറിന്റെ (27,000 കോടി രൂപ) വർദ്ധനയുണ്ടായിരുന്നു.

2021ൽ ഇതുവരെ ആസ്‌തിയിലുണ്ടായ വർദ്ധന 1,500 കോടി ഡോളറാണ് (1.09 ലക്ഷം കോടി രൂപ). നിലവിൽ ലോകത്തെ ഏറ്റവും സമ്പന്നരിൽ ബ്ളൂംബെർഗ് ശതകോടീശ്വര പട്ടികപ്രകാരം 12-ാമതാണ് മുകേഷ്. 20,070 കോടി ഡോളർ (14.66 ലക്ഷം കോടി രൂപ) ആസ്‌തിയുള്ള ജെഫ് ബെസോസാണ് (ആമസോൺ മുൻ സി.ഇ.ഒ) ഒന്നാമത്.