മുരിങ്ങക്ക മസാലക്കറി
ചേരുവകൾ
മുരിങ്ങയ്ക്ക......................നാലെണ്ണം
സവാള................ഒന്ന്
തക്കാളി.................രണ്ടെണ്ണം
മുളകുപൊടി...........ഒരു ടീ.സ്പൂൺ
മല്ലിപ്പൊടി..........ഒരു ടീ.സ്പൂൺ
കടുക്............ഒരുടീ.സ്പൂൺ
ഇഞ്ചി - വെളുത്തുള്ളി പേസ്റ്റ്.............ഒരു ടീ.സ്പൂൺ
ഗരം മസാലപ്പൊടി........ഒരു ടീ.സ്പൂൺ
കശകശ...........2 ടീ.സ്പൂൺ
മഞ്ഞൾപ്പൊടി...........അര ടീ.സ്പൂൺ
ജീരകം..........ഒരു ടീ.സ്പൂൺ
ജീരകപ്പൊടി..........അര ടീ.സ്പൂൺ
കായപ്പൊടി..........ഒരുനുള്ള്
മല്ലിയില, കൊപ്ര, മല്ലി,
കപ്പലണ്ടി, എള്ള്...............2 ടേ.സ്പൂൺ വീതം
ഉപ്പ്......................പാകത്തിന്
കറിവേപ്പില............കുറച്ച്
വെള്ളം.........ഒരു കപ്പ് + അരയ്ക്കാൻ
തയ്യാറാക്കുന്നവിധം
മല്ലിയിലയും തക്കാളിയും ചെറുതായരിഞ്ഞത് വയ്ക്കുക. സവാള നീളത്തിൽ വീതികുറച്ച് അരിയുക. മസാല അരപ്പ് തയ്യാറാക്കാം ഒന്നാം പാൽ അടുപ്പത്ത് വച്ച് ചൂടാക്കുക. ഇതിൽ കപ്പലണ്ടി ഇട്ട് ചെറുതീയിൽ വച്ച് കരുകരുപ്പാകുംവരെ വറുക്കുക. കോരുക. ഇനി എള്ള്, കശകശ, മല്ലി, കൊപ്ര എന്നിവ വറുക്കുക. മണം വന്നു തുടങ്ങുമ്പോൾ കോരി എടുത്ത് ആറാൻ വയ്ക്കുക. ഇനി ഇവ പൊടിക്കുക. ഇത് ഒരു ബൗളിലിട്ട് അരക്കപ്പ് വെള്ളം ഒഴിച്ചിളക്കി പേസ്റ്റ് രൂപത്തിലാക്കി മാറ്റിവയ്ക്കുക. ഒരുവലിയ പാത്രം അടുപ്പത്ത് വച്ച് ചൂടാക്കി രണ്ടു ടേ.സ്പൂൺ എണ്ണ ഒഴിച്ച് ചൂടാക്കുക. കടുക്, ജീരകം, കായം, കറിവേപ്പില എന്നിവയിട്ട് വറുക്കുക. കടുക് പൊട്ടുമ്പോൾ സവാള, ഇഞ്ചി - വെളുത്തുള്ളി പേസ്റ്റ് എന്നിവയിട്ട് സവാളയുടെ നിറം മാറുംവരെ വഴറ്റുക. മഞ്ഞൾ, മല്ലിപ്പൊടി, ജീരകപ്പൊടി, ഗരംമസാലപ്പൊടി, മുളകുപൊടി, ഉപ്പ് എന്നിവ കൂടിചേർത്ത് മസാലകളുടെ മണം വന്നുതുടങ്ങുമ്പോൾ തക്കാളി ചേർക്കുക. ഇത് വെന്ത് മയമാകുമ്പോൾ എണ്ണ മീതെ തെളിയും. മസാലപേസ്റ്റ് തയ്യാറാക്കിയതുമായി ചേർക്കുക. അടുപ്പത്ത് വച്ച് വേവിക്കുക. ഇനി മുരിങ്ങയ്ക്ക നീളത്തിൽ മുറിച്ചതിട്ട് ഒരു കപ്പ് വെള്ളവും ഒഴിച്ച് വേവിക്കുക. വാങ്ങിവച്ച് മല്ലിയില അരിഞ്ഞത് വിതറി അലങ്കരിക്കുക.
സോയാബോൾ മസാലക്കറി
ചേരുവകൾ
സോയാബോൾ............ 400 ഗ്രാം
സവാള.............ഒന്ന്
തക്കാളി.........രണ്ട്
ഉരുളക്കിഴങ്ങ്...........ഒന്ന്
പച്ചമുളക്..............രണ്ട്
വെളുത്തുള്ളി............നാല് അല്ലി
ഇഞ്ചി............ഒരിഞ്ച് കഷണം
ഗ്രീൻപീസ്..............അരക്കപ്പ്
മഞ്ഞൾപ്പൊടി..........ഒരു ടീ.സ്പൂൺ
മുളകുപൊടി............ഒരു ടീ.സ്പൂൺ
മല്ലിപ്പൊടി.............ഒന്നരടീ.സ്പൂൺ
ജീരകപ്പൊടി.........ഒരു ടീ.സ്പൂൺ
ജീരകം...........ഒരു ടീ.സ്പൂൺ
ഗരം മസാലപ്പൊടി...........ഒരു ടീ.സ്പൂൺ
മല്ലിയില........അരക്കെട്ട്
ഉപ്പ്...............പാകത്തിന്
എണ്ണ............2 ടേ.സ്പൂൺ
തയ്യാറാക്കുന്നവിധം
സോയാബാളുകൾ വെള്ളത്തിലിട്ട് ഒരുരാത്രി വയ്ക്കുക. അവ കുതിർന്ന് ഇരട്ടിവലിപ്പമാകും. വെള്ളം പിഴിഞ്ഞു കളഞ്ഞ് ഒരു പ്രഷർ കുക്കറിൽ ഇടുക. മൂന്നു കപ്പ് വെള്ളവും ഉപ്പും ചേർത്ത് അടച്ച് 3-4 വിസിൽ കേൾക്കുംവരെ വേവിച്ച് വാങ്ങുക. ആറിയശേഷം തുറന്ന് വെള്ളം ഊറ്റിക്കളഞ്ഞ് തണുത്തവെള്ളം മീതെ ഒഴിച്ച് 7-10 മിനിട്ട് വയ്ക്കുക. വെള്ളം പിഴിഞ്ഞ് മാറ്റി സോയാബോളുകൾ ഒരു ബൗളിൽ ഇടുക. ഒരു മിക്സി ജാറിൽ സവാള, തക്കാളി, ഇഞ്ചി, വെളുത്തുള്ളി, കാൽ ടേ.സ്പൂൺ എണ്ണയും ഒഴിച്ച് നന്നായരച്ചെടുക്കുക. ഒന്നേമുക്കാൽ ടേ.സ്പൂൺ എണ്ണ ഒരു നോൺസ്റ്റിക്ക് പാനിലൊഴിച്ച് ചൂടാക്കുക. ജീരകം ഇട്ട് വറുക്കുക. പൊട്ടുമ്പോൾ പച്ചമുളക്, സവാള, തക്കാളി അരപ്പുകൾ എന്നിവ ചേർക്കുക.നന്നായിളക്കി ചൂടാക്കുക. എണ്ണ മീതെ തെളിഞ്ഞുവരുമ്പോൾ കാൽക്കപ്പ് വെള്ളം, മഞ്ഞൾ, മുളകുപൊടി, ജീരകപ്പൊടി, മല്ലിപ്പൊടി എന്നിവ ചേർത്തിളക്കുക. 3 -4 മിനിട്ട് ഇളക്കി പച്ചമണം മാറുമ്പോൾ ഉരുളക്കിഴങ്ങും അരക്കപ്പ് വെള്ളവും ചേർത്ത് ചെറുതീയിൽ വച്ച് ഉരുളക്കിഴങ്ങ് പകുതി വേവാക്കുക. സോയാബോളുകളും ഗ്രീൻപീസും ചേർത്ത് രണ്ടുകപ്പ് വെള്ളം ഒഴിച്ചിളക്കുക. അടച്ച് 15 മിനിട്ട് വേവിക്കുക. ഗരം മസാലപ്പൊടിയും മല്ലിയിലയും ചേർത്ത് വാങ്ങുക.
ഗ്രീൻപീസ് കറി
ചേരുവകൾ
ഗ്രീൻപീസ്...............മുക്കാൽകപ്പ് (ഉണങ്ങിയത്)
സവാള.............ഒന്ന്
ഉരുളക്കിഴങ്ങ്...........ഒന്ന്
തക്കാളി................ഒന്ന്
ഇഞ്ചി - വെളുത്തുള്ളി പേസ്റ്റ്............2 ടീ.സ്പൂൺ
മഞ്ഞൾപ്പൊടി..........കാൽ ടീ.സ്പൂൺ
മുളകുപൊടി.............അര ടീ.സ്പൂൺ
പുളിപിഴിഞ്ഞത്..........ഒരു ടീ.സ്പൂൺ
ജീരകം...........കാൽ ടീ.സ്പൂൺ
മല്ലിയില ചെറുതായരിഞ്ഞത്..........ഒരു ടേ.സ്പൂൺ
എണ്ണ.................2-3 ടേ.സ്പൂൺ
ഉണക്കമുളക്..........രണ്ടെണ്ണം
മല്ലി............ഒരുടേ.സ്പൂൺ
തയ്യാറാക്കുന്നവിധം
സവാള ചെറുതായരിഞ്ഞ് വയ്ക്കുക. ഉരുളക്കിഴങ്ങ് തൊലികളഞ്ഞ് വയ്ക്കുക ഇത് ചെറു ക്യൂബുകളായി അരിഞ്ഞ് ചൂടെണ്ണയിൽ വറുത്ത് പൊൻനിറമാക്കി കോരുക. ഗ്രീൻപീസ് ഒരുരാത്രി വെള്ളത്തിലിട്ട് വയ്ക്കുക. പാൻ അടുപ്പത്ത് വച്ച് ചൂടാക്കി ഉണക്കമുളകും മല്ലിയും ജീരകവും ഇട്ട് വറുക്കുക. ചുവക്കുമ്പോൾ വാങ്ങി കോരി വയ്ക്കുക. ഒപ്പം മുളകുപൊടി, മഞ്ഞൾ, അര ടീ.സ്പൂൺ പൊടിച്ചുവച്ച മസാല എന്നിവയും ചേർക്കാം. തക്കാളി, സവാള എന്നിവ ചേർത്തിളക്കുക. ഗ്രീൻപീസ് വേകുംവരെ അടുപ്പത്ത് വയ്ക്കുക. ഉരുളക്കിഴങ്ങ് വറുത്ത് വച്ചത് കറിയിലിട്ട് പുളി പിഴിഞ്ഞതൊഴിച്ച് വാങ്ങുക. മല്ലിയിലയിട്ട് വിളമ്പുക.
പനീർ കൊഫ്ത മസാലക്കറി
ചേരുവകൾ
പനീർ..........200ഗ്രാം
തക്കാളി.............മൂന്നെണ്ണം
ഉരുളക്കിഴങ്ങ്............ഒന്ന്
ബേലീഫ്.............ഒന്ന്
കോൺഫ്ലോർ..............2 ടീ.സ്പൂൺ
ജീരകം..................ഒരു ടീ.സ്പൂൺ
മഞ്ഞൾപ്പൊടി.........അര ടീ.സ്പൂൺ
ഗരം മസാലപ്പൊടി....അര ടീ.സ്പൂൺ
ഇഞ്ചി..............ഒരു കഷണം
ടുമാറ്റോ കെച്ചപ്പ്.....ഒന്നര ടേ.സ്പൂൺ
പച്ചമുളക്...........രണ്ടെണ്ണം
മല്ലിയില....................2 ടേ.സ്പൂൺ
എണ്ണ................4 ടേ.സ്പൂൺ
വെള്ളം...........ഒരുകപ്പ്
ഉപ്പ്................പാകത്തിന്
തയ്യാറാക്കുന്നവിധം
ഒരു ബൗളിൽ പനീർ ഇടുക. ഇതിൽ കോൺഫ്ലോർ, ഉപ്പ്, ഇഞ്ചി അര ക്കഷണം ഗ്രേറ്റ് ചെയ്തത് എന്നിവയിട്ട് കുഴച്ച് മയമാക്കുക. ഇനിയിത് ചെറു ഉരുളകളാക്കി മാറ്റുക. ഒരു പാനിൽ എണ്ണയൊഴിച്ച് ചൂടാക്കി, പനീർ ഉരുളകൾ ഇട്ട് വറുത്ത് എല്ലായിടവും പൊൻനിറമാക്കി കോരുക. ഇതേ എണ്ണയിൽ ബേലീഫ്, ജീരകം, ഉരുളക്കിഴങ്ങ് ചുരണ്ടി ചെറു ക്യൂബുകളായി അരിഞ്ഞത് എന്നിവയിട്ട് ഇളക്കി അല്പം വേവിക്കുക. ഇനി തക്കാളി അരിഞ്ഞത് അര ഇഞ്ച് കഷണം ഇഞ്ചി ഗ്രേറ്റ് ചെയ്തത്, ഗരം മസാലപ്പൊടി, മഞ്ഞൾ എന്നിവ ഒരു മിക്സി ജാറിൽ എടുത്തരച്ച് ഉരുളക്കിഴങ്ങുമായി ചേർക്കുക. എണ്ണ മീതെ തെളിയുംവരെ വേവിക്കുക. തക്കാളി കെച്ചപ്പ്,രണ്ടായിപിളർന്ന പച്ചമുളക്, വെള്ളം എന്നിവ ചേർത്ത് ചെറുതീയിൽ വയ്ക്കുക. ഇനി വറുത്ത് വച്ച പനീർ ഉരുളകളിട്ട് രണ്ട് മിനിട്ട് ചെറുതീയിൽ വച്ചശേഷം വാങ്ങുക. മല്ലിയില ഇട്ട് അലങ്കരിക്കുക. അടച്ചുവയ്ക്കുക. അഞ്ചുമിനിട്ടിനുശേഷം വാങ്ങുക.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |