മലപ്പുറം ബാങ്ക് ലയനം: ചർച്ചയ്ക്ക് തയ്യാർ

തിരുവനന്തപുരം: മലപ്പുറം ജില്ലാ ബാങ്കിനെ കേരള ബാങ്കിൽ ലയിപ്പിക്കുന്നതിന് ചർച്ചയ്ക്ക് സർക്കാർ തയ്യാറാണെന്ന് സഹകരണ മന്ത്രി വി.എൻ.വാസവൻ നിയമസഭയിൽ പറഞ്ഞു. സംസ്ഥാന, ജില്ലാതലത്തിൽ ഇതിനായി ചർച്ച നടത്തി. ഇനിയും ചർച്ച നടത്താൻ സർക്കാരിന് മടിയില്ലെന്ന് കേരള സഹകരണ സംഘം (രണ്ടാം ഭേദഗതി) ബില്ലിന്റെ ചർച്ചയ്ക്കുള്ള മറുപടിയിൽ മന്ത്രി പറഞ്ഞു. മലപ്പുറം ജില്ലയുടെ ആകെ സമഗ്രത അടിസ്ഥാനമാക്കിയാണ് കേരള ബാങ്ക് രൂപകല്പന ചെയ്തിരിക്കുന്നത്. കേരള ബാങ്കിൻെറ 769 ശാഖകൾക്കും റിസർവ് ബാങ്കിന്റെ അംഗീകാരം ലഭിച്ചു.

സഹകരണ നിയമത്തിന്റെ സമഗ്ര നിയമഭേദഗതി അടുത്ത നിയമസഭ സമ്മേളനത്തിൽ കൊണ്ടുവരും. ബില്ലിന്റെ കരടായി. സമ്മേളനത്തിൽ മറ്റൊരു സഹകരണ ബിൽ ഉണ്ടായതുകൊണ്ടാണ് അവതരിപ്പിക്കാതിരുന്നതെന്നും മന്ത്രി പറഞ്ഞു. കേരള സഹകരണ സംഘം (രണ്ടാം ഭേദഗതി) ബിൽ സബ്ജക്ട് കമ്മിറ്റിക്ക് വിട്ടു.