കോഴിക്കോട്: ഫ്ലാറ്റ് തട്ടിപ്പ് പരാതിയിൽ അത്​ലറ്റ് പി ടി ഉഷയ്‌ക്കെതിരെ വീണ്ടും ആരോപണവുമായി മുൻ ഇന്റർനാഷണൽ താരവും കണ്ണൂർ സ്​പോർട്​സ്​ ഡിവിഷനിൽ ഉഷയുടെ ജൂനിയറുമായിരുന്ന ജെമ്മ ജോസഫ് രംഗത്തെത്തി. വാഗ്ദ്ധാനം ചെയ്ത ഫ്ലാറ്റിനെക്കുറിച്ച് ചോദിച്ചപ്പോൾ പി ടി ഉഷ ഭീഷണിപ്പെടുത്തിയെന്നും പൊലീസ് ഉഷയുടെ ഭാഗത്താണെന്നുമാണ് ജെമ്മ ജോസഫ് പറയുന്നത്.

നേരത്തേ ഫ്ലാറ്റ്​ നൽകാമെന്ന്​ പറഞ്ഞ്​ 46 ലക്ഷം വാങ്ങി വഞ്ചിച്ചെന്ന പരാതിയിൽ ​ പി.ടി. ഉഷയടക്കം ഏഴു പേർക്കെതിരെ വഞ്ചനാ കു​റ്റത്തിനാണ്​ വെള്ളയിൽ ​പൊലീസ്​ കേസെടുത്തിരുന്നു. ജെമ്മയുടെ പരാതിയിലാണ് കേസെടുത്തത്. പറഞ്ഞ സമയത്ത് ഫ്ലാറ്റ്​​ രജിസ്​റ്റർ ചെയ്​ത്​ നൽകിയില്ലെന്നും പണം തിരിച്ചുനൽകിയില്ലെന്നും പരാതിയിൽ പറയുന്നു. മെഡിക്കൽ കോളജിലെ മുൻ ഡോക്​ടർ അടക്കമുള്ളവരും പ്രതികളാണ്​. അടുത്ത സുഹൃത്തായ പി.ടി ഉഷ, നിരന്തരം പ്രേരിപ്പിച്ചതിനാൽ ഫ്ലാറ്റിനായി തുക നൽകി താൻ വഞ്ചിതയായെന്ന്​ ജെമ്മ ജോസഫ്​ പരാതിയിൽ പറയുന്നത്.