കെ-റെയിലിനെതിരെ സാംസ്‌കാരിക സമരയാത്രയ്‌ക്ക് ഇന്ന് തുടക്കം

തിരുവനന്തപുരം: സർക്കാർ സിൽവർലൈൻ പദ്ധതിയിൽ നിന്ന് പിന്തിരിയണമെന്ന് ആവശ്യപ്പെട്ട് 'കെ റെയിൽ വേഗതയല്ലിത് വേദനമാത്രം" എന്ന മുദ്രാവാക്യവുമായി സംസ്‌കാര സാഹിതി സംസ്ഥാന കമ്മിറ്റിയുടെ ആഭിമുഖ്യത്തിൽ സാംസ്‌കാരിക സമരയാത്രയ്ക്ക് ഇന്ന് കഴക്കൂട്ടത്ത് തുടക്കമാകും. ഇന്ന് വൈകിട്ട് അഞ്ചിന് കെ.പി.സി.സി പ്രസിഡന്റ് കെ. സുധാകരൻ ജാഥാ ക്യാപ്ടൻ സംസ്‌കാരസാഹിതി പ്രസിഡന്റ് ആര്യാടൻ ഷൗക്കത്തിന് പതാക കൈമാറി ഉദ്ഘാടനം ചെയ്യും.
ആര്യാടൻ ഷൗക്കത്ത് രചനയും സംവിധാനവും നിർവഹിച്ച 'കലികാലക്കല്ല്' എന്ന തെരുവ് നാടകവും നാടൻപാട്ടുകളും വരയും വർത്തമാനവുമായി 11 ജില്ലകളിലും ജനങ്ങളുമായി സംവദിച്ചുകൊണ്ടു കടന്നുപോകുന്ന സാംസ്‌കാരിക സമരയാത്ര 14ന് കാസർകോട്ട് സമാപിക്കും. കെ-റെയിലിനെതിരെ 10,000 സാംസ്‌കാരിക പ്രവർത്തകർ ഒപ്പിട്ട പ്രതിഷേധപത്രിക രാഷ്ട്രപതിക്ക് സമർപ്പിക്കും.