അഹമ്മദാബാദ്: ഗുജറാത്തിലെ മുന്ദ്ര തുറമുഖത്ത് വീണ്ടും വൻലഹരിമരുന്ന് വേട്ട. വിദേശത്ത് നിന്ന് കണ്ടെയ്‌നറിൽ കടത്തിയ 56 കിലോ കൊക്കെയ്‌ൻ ആണ് ഡയറക്‌ടറേറ്റ് ഒഫ് റവന്യു ഇന്ളലിജൻസ് പിടിച്ചെടുത്തത്. വിപണിയിൽ 500 കോടിയിലധികം രൂപ ഇതിന് വിലവരുമെന്നാണ് നിഗമനം. രഹസ്യവിവരത്തിന്റെ അടിസ്ഥാനത്തിലായിരുന്നു പരിശോധന. കണ്ടെയ്‌നറിൽ ഇറക്കുമതി ചെയ്ത മറ്റു സാധനങ്ങൾക്കിടയിൽ ഒളിപ്പിച്ച നിലയിലായിരുന്നു കൊക്കെയ്‌ൻ സൂക്ഷിച്ചിരുന്നത്.

കഴിഞ്ഞ മാസം 1300 കോടി രൂപ.യുടെ ഹെറോയിൻ ഡി.ആ‍ർ.ഐ കണ്ട്‌ല തുറമുഖത്ത് നിന്ന് പിടികൂടിയിരുന്നു,​ സെപ്‌തംബറിൽ മുന്ദ്ര തുറമുഖത്ത് വച്ച് അഫ്‌ഗാനിൽ നിന്നും കടത്തിയ 3000 കിലോ മയക്കുമരുന്ന് പിടികൂടിയിരുന്നു. അന്താരാഷ്ട്ര വിപണിയിൽ ഇതിന് 21000 കോടി വിലവരുമെന്നാണ് കണക്കുകൾ.