സെഡാൻ ലോകം വാഴാൻ ഫോക്‌സ്‌വാഗൻ വെർട്യൂസ്

കൊച്ചി: എസ്.യു.വികൾ അരങ്ങുവാഴുന്ന ഇന്ത്യൻ വാഹനവിപണി കീഴടക്കുന്നത് ലക്ഷ്യമിട്ട് ഫോക്‌സ്‌വാഗൻ അവതരിപ്പിക്കുന്ന പുത്തൻ സെഡാൻ 'വെർട്യൂസ് " ജൂൺ 9ന് വിപണിയിലെത്തും. രൂപകല്പനയിലും പെർഫോമൻസിലും യാത്രാസൗകര്യത്തിലും സുരക്ഷയിലും വൻ മികവുകളുമായാണ് ഈ പ്രീമിയം മിഡ്‌-സൈസ് സെഡാൻ ഉപഭോക്താക്കളിലേക്ക് എത്തുന്നത്.

വിലയും മൈലേജുമടക്കമുള്ള വിവരങ്ങളും ജൂൺ 9ന് അറിയാം. വെർട്യൂസിന് ഇതിനകം 3,​000ലേറെ പ്രീ-ബുക്കിംഗ് ലഭിച്ചുകഴിഞ്ഞു. കേരളത്തിൽ നിന്നുള്ള പ്രീ-ബുക്കിംഗ് 300 കടന്നു. വെർട്യൂസിന്റെ പ്രീ-ലോഞ്ചിംഗിനായി കൊച്ചിയിലെത്തിയ ഫോക്‌സ്‌‌വാഗൻ പാസ‍‍ഞ്ചർ കാർസ് ഇന്ത്യ ബ്രാൻഡ് ഡയറക്‌ടർ ആശിഷ് ഗുപ്‌ത സംസാരിക്കുന്നു.

 വെർട്യൂസിന്റെ വിശേഷങ്ങൾ?​

പൂർണമായും ഇന്ത്യൻ നിരത്തുകൾക്ക് ഇണങ്ങുന്ന സെഡാനാണ് വെർട്യൂസ്. വിപണിയിൽ വെർട്യൂസിന് എതിരാളികളേ ഉണ്ടാവില്ലെന്ന് ഞങ്ങൾ പ്രതീക്ഷിക്കുന്നു. കാരണം മികച്ച നിർമ്മാണനിലവാരം,​ 40ലേറെ ഉന്നത സുരക്ഷാഫീച്ചറുകൾ,​ ഫൺ ടു ഡ്രൈവ് ആശയങ്ങളിലൂന്നിയാണ് വെർട്യൂസിനെ ഒരുക്കിയിട്ടുള്ളത്.

 എം.ക്യു.ബി പ്ളാറ്റ്‌ഫോമിനെക്കുറിച്ച്?​

ഇന്ത്യയ്‌ക്കായി 100 കോടി യൂറോ നിക്ഷേപത്തോടെ ഫോക്‌സ്‌വാഗൻ ഗ്രൂപ്പ് ഒരുക്കിയ ഇന്ത്യ 2.0 പ്രോജക്‌ടിന് കീഴിൽ എം.ക്യു.ബി എ.ഒ ഐ.ൻ പ്ളാറ്റ്‌ഫോമിൽ ഒരുക്കിയ ബ്രാൻഡിന്റെ രണ്ടാമത്തെ മോ‌ഡലാണ് വെർട്യൂസ്. വിപണിയിൽ വെർട്യൂസ് ചുവടുവയ്ക്കുന്നതോടെ ഇന്ത്യ 2.0 പ്രൊജക്‌ടിന്റെ ലക്ഷ്യവും പൂർത്തിയാവും.

 ഇന്ത്യ 2.0 പൂർത്തിയാവുമ്പോൾ തുടർപദ്ധതികൾ?​

വാഹന നിർമ്മാണത്തിന്റെ പുതിയഘട്ടത്തിലേക്ക് പ്രവേശിക്കാനാണ് ഇനി ഗ്രൂപ്പ് ലക്ഷ്യമിടുന്നത്. ഉദ്ദേശിച്ചത് ഇലക്‌ട്രിക് കാറുകൾ തന്നെ. അതിനായി ആഗോളതലത്തിൽ കമ്പനി ഒരുക്കിയ 'എം.ഇ.ബി" പ്ളാറ്റ്‌ഫോം ഇന്ത്യയ്ക്കും അനുയോജ്യമാണെന്ന് കരുതുന്നു. 2025ഓടെ ഇന്ത്യയിൽ ബ്രാൻഡിന്റെ ആദ്യ സമ്പൂർണ ഇലക്‌ട്രിക് കാർ വില്പനയ്ക്കെത്തും.

 എസ്.യു.വികൾക്കാണ് ഇന്ത്യയിൽ ഏറെ ഡിമാൻഡ്. അവയോടാണ് വെർട്യൂസ് ഏറ്റുമുട്ടുന്നത്?​

സെഡാനുകളുടെയും പ്രിയവിപണിയാണ് ഇന്ത്യ. മിഡ്-സൈസ് പ്രീമിയം സെഡാൻ ശ്രേണിയിലെ ഏറ്റവും വലിയ മോഡലാണ് വെർട്യൂസ്. 95 ശതമാനവും പ്രാദേശികഘടകങ്ങൾ ഉപയോഗിച്ചാണ് വെർട്യൂസ് നിർമ്മിച്ചത്.

ആകർഷകമായ പുറംമോടി,​ വിശാലമായ അകത്തളം,​ വിനോദ സംവിധാനങ്ങൾ,​ സുരക്ഷാഫീച്ചറുകൾ എന്നിവ ആരെയും ആകർഷിക്കുമെന്ന് ഉറപ്പാണ്.

 മികവുകൾ വിശദമാക്കാമോ?​

ജർമ്മൻ എൻജിനിയറിംഗിലാണ് വെർട്യൂസ് ഒരുങ്ങിയത്. 20.32 സെന്റീമീറ്റർ ‌ഡിജിറ്റൽ കോക്ക്‌പിറ്റ്,​ 25.65 സെന്റീമീറ്റർ ടച്ച്‌സ്ക്രീൻ ഇൻഫോടെയ്‌ൻമെന്റ്,​ കീലെസ് എൻട്രിയും എൻജിൻ സ്‌റ്റാർട്ടും,​ ഇലക്‌ട്രിക് സൺറൂഫ്,​ സ്മാർട്ട് ടച്ച് ക്ളൈമട്രോണിക് എ.സി.,​ മികച്ച സ്പീക്കറുകൾ,​ വയർലെസ് മൊബൈൽ ചാർജിംഗ്,​ വിശാലമായ ഹെഡ്,​ ലെഗ്,​ ഷോൾഡർ റൂമുകൾ,​ വെന്റിലേറ്റഡ് സീറ്റുകൾ,​ ആറ് എയർബാഗുകളും റിവേഴ്‌സ് കാമറയും ഉൾപ്പെടെ 40ലേറെ സുരക്ഷാഫീച്ചറുകൾ എന്നിങ്ങനെ മികവുകളാൽ സമ്പന്നമാണ് വെർട്യൂസ്. 521 ലിറ്റർ ബൂട്ട്‌സ്പേസുണ്ട്.

വൈൽഡ് ചെറി റെഡ്,​ കാർബൺ സ്‌റ്റീൽ ഗ്രേ,​ റിഫ്ളക്‌സ് സിൽവർ,​ കുർക്കുമ യെല്ലോ,​ കാൻഡി വൈറ്റ്,​ പുതിയ റൈസിംഡ് ബ്ളൂ നിറങ്ങളിൽ വെർട്യൂസ് ലഭിക്കും.

 എൻജിനെക്കുറിച്ച്?​

1.0 ലിറ്റർ,​ 1.5 ലിറ്റർ ടർബോ പെട്രോൾ എൻജിനുകളും മാനുവൽ,​ ഓട്ടോമാറ്റിക് ഗിയർ ഓപ്‌ഷനുകളുമുണ്ട്. 190 കിലോമീറ്ററാണ് ടോപ്‌സ്പീഡ്. പൂജ്യത്തിൽ നിന്ന് 100 കിലോമീറ്റർ വേഗം കൈവരിക്കാൻ 9 സെക്കൻഡ് ധാരാളം.

 കേരള വിപണിയുടെ പ്രകടനം?​

ഫോക്‌സ്‌വാഗന്റെ സുപ്രധാന വിപണിയാണ് കേരളം. ഞങ്ങളുടെ മൊത്തം വില്പനയുടെ 14-15 ശതമാനം കേരളത്തിലാണ്. പോളോയ്ക്ക് ഇവിടെ വലിയ സ്വീകാര്യത കിട്ടിയിരുന്നു. അതേസ്‌നേഹം എസ്.യു.വിയായ ടൈഗൂണിനും ഇപ്പോൾ കിട്ടുന്നു. ശ്രേണിയിൽ 25 ശതമാനം വിഹിതം കേരളത്തിൽ ടൈഗൂണിനുണ്ട്. 2,​500ലേറെ ടൈഗൂണുകൾ കേരള നിരത്തിലുണ്ട്.

 വിലക്കയറ്റം,​ പലിശനിരക്ക് വർദ്ധന തുടങ്ങിയ വെല്ലുവിളികൾ എങ്ങനെയാണ് വാഹന വിപണിയെ ബാധിക്കുന്നത്?​

തീർച്ചയായും വിലക്കയറ്റവും ഉയരുന്ന പലിശനിരക്കും വെല്ലുവിളിയാണ്. ഇതിന്റെ പ്രതിഫലനം വരുംമാസങ്ങളിൽ ദൃശ്യമാകാനാണ് സാദ്ധ്യത. എന്നാൽ,​ ആകർഷക വിലയിൽ ഉപഭോക്തൃസൗഹൃദ മോഡലുകളിലൂടെ ഈ പ്രതിസന്ധി തരണം ചെയ്യാനാകുമെന്നാണ് കരുതുന്നത്.