ന്യൂഡൽഹി: വിമാനത്തിലും വിമാനത്താവളത്തിലും യാത്രക്കാർ മാസ്ക് ധരിക്കുന്നത് കർശനമാക്കി സിവിൽ വ്യോമയാന മന്ത്രാലയം. കൊവിഡ് വർദ്ധിക്കുന്ന സാഹചര്യത്തിൽ വിമാനത്തിൽ മാസ്‌ക് ധരിക്കുന്നത് ഉറപ്പാക്കണമെന്ന ഡൽഹി ഹൈക്കോടതി ഉത്തരവിനെ തുടർന്നാണ് നടപടി.

വിമാനം പുറപ്പെടും മുമ്പ് യാത്രക്കാർ മാസ്‌ക് ധരിച്ചെന്ന് ജീവനക്കാർ ഉറപ്പാക്കണം. വിസമ്മതിക്കുന്ന യാത്രക്കാരെ വിമാനത്തിൽ നിന്ന് ഇറക്കിവിടണം. വിമാനം പുറപ്പെട്ട ശേഷമാണ് അനുസരണക്കേടെങ്കിൽ 'അച്ചടക്കമില്ലാത്ത' യാത്രക്കാരനായി കണക്കാക്കി പിഴ ചുമത്തി, യാത്രാ വിലക്കേർപ്പെടുത്തണം.

ആഭ്യന്തര വിമാനങ്ങളിൽ യാത്രക്കാർ മാസ്‌ക് ധരിക്കുന്നില്ലെന്ന ഒരു സിറ്റിംഗ് ജഡ്‌ജിന്റെ പരാതി പരിഗണിച്ചാണ് ജൂൺ മൂന്നിന് ഡൽഹി ഹൈക്കോടതി സിവിൽ വ്യോമയാന മന്ത്രാലയത്തിന് കർശന നിർദ്ദേശം നൽകിയത്.