തകഴിയുടെ നാട്ടുകാരിക്ക് തെലങ്കാനയിൽ ഒന്നാം റാങ്ക്

ന്യൂഡൽഹി: മലയാള ഭാഷയെ ലോകശ്രദ്ധയിൽ കൊണ്ടുവന്ന കഥാകാരൻ തകഴി ശിവശങ്കരപ്പിള്ളയുടെ നാട്ടുകാരിക്ക് തെലങ്കാന പത്താം ക്ലാസ് പരീക്ഷയിൽ ഒന്നാം റാങ്ക്. എ. സ്വാതി പ്രിയയാണ് ഈ നേട്ടം കൊയ്തത്. തെലങ്കാനയിലെ ജഗതിയാൽ ജില്ലയിൽ കേരള ഹൈസ്കൂൾ പ്രിൻസിപ്പൽ അനിൽ സിംഗിന്റെയും അവിടെ അദ്ധ്യാപികയായ ഷീനയുടെയും മകളാണ് സ്വാതി പ്രിയ. എല്ലാ വിഷയങ്ങൾക്കും സ്വാതിക്ക് എ പ്ലസ് ലഭിച്ചു. ഇന്നലെയാണ് തെലങ്കാന പത്താം ക്ലാസ് ഫലം പ്രഖ്യാപിച്ചത്. മകളുടെ തുടർ പഠനം കേരളത്തിലാണെന്ന് അനിൽ സിംഗ് പറഞ്ഞു. പ്ലസ് വണ്ണിന് ചങ്ങനാശ്ശേരി ഗുഡ് ഷെപ്പേർഡ് സ്കൂളിൽ ചേർന്നു. സഹോദരി: ദേവ പ്രിയ.