മാളിയേക്കൽ മറിയുമ്മ നിര്യാതയായി

തലശേരി: മലബാറിലെ മുസ്ലിം കുടുംബങ്ങളിൽ നിന്ന് ആദ്യമായി ഇംഗ്ലീഷ് വിദ്യാഭ്യാസം നേടിയ തലശ്ശേരി ടി.സി മുക്കിലെ പുതിയ മാളിയേക്കൽ തറവാട്ടിലെ പി.എം മറിയുമ്മ (98) നിര്യാതയായി.
ദശകങ്ങൾക്ക് മുമ്പെ സ്ത്രീ സാക്ഷരതയ്ക്കായി അനവരതം പ്രവർത്തിച്ച വനിതയാണിവർ. ദേശീയ വാദികളും കേരളത്തിലെ പ്രമുഖ വനിതാ നേതാക്കളുമായ സി.കെ.രേവതിയമ്മ, ചിന്നമ്മാളുവമ്മ, എ.വി. കുട്ടിമാളു അമ്മ തുടങ്ങിയവർക്കൊപ്പം പ്രവർത്തിച്ചിട്ടുണ്ട്. തലശ്ശേരി വർഗ്ഗീയകലാപ കാലത്ത് ജാതിമതഭേദമെന്യേ നിരവധി കുടുംബങ്ങൾക്ക് അത്താണിയായിരുന്നു മാളിയേക്കൽ തറവാട്.

പരേതരായ വാഴയിൽ ഒ.വി അബ്ദുള്ളയുടെയും മാഞ്ഞുമ്മയുടെയും മകളാണ്. ഭർത്താവ്: പരേതനായ വി.ആർ മായൻ ഹാജി. മക്കൾ: ആയിശ, അബ്ബാസ് (ഷാർജ), പരേതരായ മശൂദ്, സാറ. മരുമക്കൾ: പരേതനായ പി.എം മമ്മൂട്ടി, സാഹിദ, ഖാദർ ഇല്ലിക്ക, മഹിജ.
ചിറക്കര അയ്യലത്ത് പള്ളി കബർസ്ഥാനിൽ കബറടക്കി. മറിയുമ്മയുടെ നിര്യാണത്തിൽ മുഖ്യമന്ത്രി പിണറായി വിജയൻ അനുശോചിച്ചു.