തേങ്ങയും മീനും കൊണ്ടുവരാൻ മോൻസൺ ഉപയോഗിച്ചത് ഡി ഐ ജിയുടെ വാഹനം, കൊവിഡ് കാലത്ത് യാത്ര ചെയ്തത് ഐ ജിയുടെ ഒപ്പും സീലും ഉപയോഗിച്ചെന്ന് മുൻ ഡ്രൈവർ

കൊച്ചി: പുരാവസ്തു തട്ടിപ്പ് കേസ് പ്രതി മോൻസൺ മാവുങ്കലിനെതിരെ വെളിപ്പെടുത്തലുമായി മുൻ ഡ്രൈവർ ജെയ്സൺ. പൊലീസ് വാഹനം ദുരുപയോഗം ചെയ്‌തെന്നാണ് വെളിപ്പെടുത്തൽ. കൊവിഡ് കാലത്ത് മോൻസണും സുഹൃത്തുക്കളും ഐ ജി ലക്ഷ്മണയുടെ ഒപ്പും സീലും ഉപയോഗിച്ചാണ് യാത്ര ചെയ്തിരുന്നതെന്ന് ജെയ്‌സൺ പറഞ്ഞു.

ഐ ജിയുമായി ജെയ്‌സൺ നടത്തിയ വാട്സാപ്പ് ചാറ്റുകളും പുറത്തുവന്നിട്ടുണ്ട്. കൂടാതെ തേങ്ങ, മീൻ തുടങ്ങിയവ കൊണ്ടുവരാൻ മോൻസൺ ഡി ഐ ജിയുടെ വാഹനം ഉപയോഗിച്ചെന്നും മുൻ ഡ്രൈവർ ആരോപിച്ചു.

മോൻസണിന്റെ സഹോദരിയുടെ ചേർത്തലയിലെ വീട്ടിൽ നിന്നാണ് ഡി ഐ ജിയുടെ വാഹനത്തിൽ തേങ്ങയും മീനും കൊണ്ടുവന്നത്. ഇതുമായി ബന്ധപ്പെട്ടുള്ള തെളിവുകൾ ക്രൈം ബ്രാഞ്ചിന് കൈമാറിയിട്ടുണ്ടെന്നും ജെയ്‌സൺ പറഞ്ഞു.