കേസുമായിട്ടൊന്നും അവർ പോകില്ല, വന്ന് സ്നേഹത്തോടെ ചെയ‌്തുകൊടുക്കുന്നതാണ് നല്ലത്: വീട്ടുകാർക്ക് നാശനഷ്‌ടമുണ്ടാക്കിയ കരാറുകാരനോട് ഗണേശ് കുമാർ

കൊല്ലം: കൊട്ടാരക്കരയിൽ കോൺക്രീറ്റ് മിശ്രിതവുമായി പോയ ലോറി വീടിന് മുകളിലേക്ക് മറിഞ്ഞ് വൻ നാശനഷ്‌ടം. ഭിത്തിയടക്കം തകർത്താണ് ലോറി വീടിനുള്ളിലേക്ക് മറിഞ്ഞത്. ജനാലകളും ഫർണിച്ചറുമെല്ലാം തകർന്ന് തരിപ്പണമായി. കൊട്ടാരക്കര മൈലം സ്വദേശി രാമചന്ദ്രൻപിള്ളയുടെ വീട്ടിലേക്കാണ് കോൺഗ്രീറ്റ് മിക്സർ ലോറി പാഞ്ഞുകയറിയത്. കോൺക്രീറ്റ് മിശ്രിതം വീട്ടിലേക്ക് വീണ് ഉറഞ്ഞ അവസ്ഥയിലാണിപ്പോൾ. പ്രാഥമികമായ വിലയിരുത്തലിൽ അഞ്ചുലക്ഷം രൂപയുടെ നാശനഷ്‌ടം വീടിനുണ്ടായിട്ടുണ്ട്. എന്നാൽ അപകടം നടന്ന് അഞ്ച് ദിവസം പിന്നിട്ടിട്ടും കരാറുകാരൻ സംഭവസ്ഥലത്തേക്ക് തിരിഞ്ഞു നോക്കിയിട്ടില്ല. വെള്ളമോ വൈദ്യുതിയോ ഉപയോഗിക്കാൻ കഴിയാതെ ഒരു മുറിക്കുള്ളിൽ കഴിയുകയാണ് കുടുംബമിപ്പോൾ.

സംഭവമറിഞ്ഞ് പത്തനാപുരം എംഎൽഎ കെ.ബി ഗണേശ് കുമാർ സ്ഥലം സന്ദർശിച്ചിരുന്നു. കരാറുകാരനുമായി ചർച്ച നടത്തി ഉടൻ പരിഹാരം കണ്ടെത്തുമെന്ന് എംഎൽഎ, രാമചന്ദ്രൻപിള്ളയ‌്ക്കും കുടുംബത്തിനും ഉറപ്പു നൽകിയിട്ടുണ്ട്. വീട്ടുകാർക്ക് കാശല്ല, പകരം നാശനഷ്‌ടങ്ങൾ നികത്തി വീട് പുനർനിർമ്മിച്ചു നൽകുക മാത്രമാണ് പരിഹാരമെന്ന് ഗണേശ് വ്യക്തമാക്കി. കൊട്ടാരക്കരിയിലെ ഒരു ഹോട്ടലിൽ ജീവനക്കാരനാണ് രാമചന്ദ്രൻപിള്ള.