ആരാണ് ഷാരൂഖ് ഖാൻ,​ പഠാൻ സിനിമയെക്കുറിച്ച് അസം മുഖ്യമന്ത്രിയുടെ മറുപടി ഇങ്ങനെ

ഗുവാഹത്തി: പഠാൻ സിനിമയക്കുറിച്ചുള്ള വിവാദങ്ങൾ തുടരുന്നതിനിടെ ഷാരൂഖ് ഖാൻ ആരാണെന്ന ചോദ്യവുമായി അസം മുഖ്യമന്ത്രി ഹിമന്ത ബിശ്വ ശർമ്മ. അസമിലെ നരേഗിയിൽ പഠാൻ പ്രദർശനത്തിനെത്തുന്ന തിയേറ്ററിന് മുന്നിൽ ബജ്‌രംഗ് പ്രവർത്തകർ നടത്തിയ പ്രതിഷേധത്തെക്കുറിച്ചുള്ള ചോദ്യം ഉന്നയിച്ചപ്പോഴായിരുന്നു ഹിമന്തയുടെ പ്രതികരണം.

ആരാണ് ഷാരൂഖ് ഖാൻ,​ അദ്ദേഹത്തെ കുറിച്ചോ പഠാൻ എന്ന സിനിമയെക്കുറിച്ചോ എനിക്കറിയില്ല. ബോളിവുഡിലെ പലരും എന്നെ വിളിക്കാറുണ്ടെങ്കിലും ഈ പ്രശ്നവുമായി ബന്ധപ്പെട്ട് ഷാരൂഖ് ഖാൻ എന്നെ വിളിച്ച് സംസാരിച്ചിട്ടില്ല. അദ്ദേഹം എന്നോട് സംസാരിക്കുകയാണെങ്കിൽ വിഷയത്തിൽ ഇടപെടാം,​ നിയമലംഘനങ്ങൾ നടന്നിട്ടുണ്ടെങ്കിൽ നടപടി സ്വീകരിക്കുമെന്നും മുഖ്യമന്ത്രി പറഞ്ഞു.

പഠാനിലെ ബേഷ്‌രംഗ് എന്ന ഗാനരംഗത്തിൽ ദീപിക കാവി നിറത്തിലുള്ള ബിക്കിന് ധരിച്ചതിന്റെ പേരിലാണ് വിവാദം ഉടലെടുത്തത്. വിഷയത്തിൽ ആർ,​എസ്,​എസും വിശ്വഹിന്ദ് പരിഷത്തും ഉൾപ്പെടെയുള്ളവർ പ്രതിഷേധവുമായി രംഗത്തെത്തിയിരുന്നു. തുടർന്ന് നിരവധി കട്ടുകളോടെയാണ് ചിത്രത്തിന് പ്രദർശനാനുമതി നൽകിയത്.