ബാങ്കിടപാടുകൾ ഈ ദിവസങ്ങളിൽ തടസപ്പെട്ടേക്കാം , ഉപഭോക്താക്കൾക്ക് മുന്നറിയിപ്പ് നൽകി എസ് ബി ഐ, അറിയിപ്പ് ബാങ്ക് പണിമുടക്കിന്റെ പശ്ചാത്തലത്തിൽ

ന്യൂഡൽഹി : രാജ്യത്തെ ബാങ്ക് യൂണിയനുകളുടെ സംയുക്ത ഫോറമായ യുണൈറ്റഡ് ഫോറം ഓഫ് ബാങ്ക് യൂണിയൻസ് ആഹ്വാനം ചെയ്തിരിക്കുന്ന പണിമുടക്കിന്റെ പശ്ചാത്തലത്തിൽ ഉപഭോക്താക്കൾക്ക് എസ്.ബി.ഐയുടെ മുന്നറിയിപ്പ്. ജനുവരി 30,​ 31 തീയതികളിലാണ് യൂണിയനുകൾ അഖിലേന്ത്യാ പണിമുടക്കിന് ആഹ്വാനം ചെയ്തിരിക്കുന്നത്. അതിനാൽ ബാങ്കിന്റെ സേവനങ്ങൾ ഈ ദിവസങ്ങളിൽ തടസപ്പെട്ടേക്കാം. മാസാവസാനം കൂടി ആയതിനാൽ ഈ ദിവസങ്ങളിൽ ബാങ്ക് ഇടപാടുകൾ നടത്താൻ തീരുമാനിച്ചിരുന്നവർ ശ്രദ്ധിക്കണം,​ ഈ തീയതിക്ക് മുമ്പ് ഇടപാടുകൾ നടത്താൻ ശ്രദ്ധിക്കണമെന്നും എസ്.ബി.ഐ അറിയിച്ചു.

പ്രതിമാസ അടവുകൾ,​ ഇ,​എം.ഐ,​ ഡെപ്പോസിറ്റ്,​ പണം പിൻവലിക്കൽ തുടങ്ങിയ ഇടപാടുകൾ ഈ ദിവസങ്ങളിൽ നടത്താൻ തീരുമാനിച്ചിട്ടുണ്ടെങ്കിൽ അതിന് മുൻപ് നടത്താൻ ശ്രമിക്കണം,​ അതേസമയം ബാങ്കിൽ സാധാരണ പ്രവർത്തങ്ങൾ തുടരുന്നതിന് ആവശ്യമായ ക്രമീകരണങ്ങൾ ചെയ്തിട്ടുണ്ടെന്ന് എസ്.ബി.ഐ അറിയിച്ചു.

11-ാം ശമ്പള പരിഷ്കരണം,​ ബാങ്കുകളിൽ ആഴ്ചയിൽ അഞ്ച് പ്രവൃത്തി ദിനങ്ങൾ എന്നിവയുമായി ബന്ധപ്പെട്ട പ്രശ്നങ്ങൾ പരിഹരിക്കുക,​ നിയമന നടപടികൾ ആരംഭിക്കുക,​ തുടങ്ങി നിരവധി ആവശ്യങ്ങൾ ഉന്നയിച്ചാണ് ബാങ്ക് ജീവനക്കാർ പണിമുടക്കുന്നത്.