പത്തനംതിട്ട: മാലിന്യ കൂമ്പാരത്തിന് തീ പിടിച്ചു. പത്തനംതിട്ട കുളനട മാർക്കറ്റിലെ ഹരിത കർമ്മ സേന ശേഖരിക്കുന്ന മാലിന്യം സൂക്ഷിക്കുന്നിടത്താണ് തീ പിടിച്ചത്. ഫയർ ഫോഴ്‌സ് എത്തി തീ അണച്ചെങ്കിലും പുക നിയന്ത്രണ വിധേയമാക്കാനുള്ള ശ്രമം തുടരുകയാണ്. ഇതിന്റെ അടുത്തായി പ്രാഥമിക ആരോഗ്യകേന്ദ്രമുണ്ട്. അതിനാൽ തന്നെ രോഗികളുടെ സുരക്ഷ കണക്കിലെടുത്ത് പുക നിയന്ത്രണ വിധേയമാക്കാനുള്ള ശ്രമം തുടരുകയാണ്.

ആദ്യ ഘട്ടത്തിൽ നാട്ടുകാരാണ് തീ അണയ്ക്കാൻ എത്തിയത്. ഹരിത കർമ്മ സേന വിവിധ ഇടങ്ങളിൽ നിന്ന് ശേഖരിക്കുന്ന മാലിന്യം തള്ളുന്ന ഇടമാണിത്. അതിനാൽ തന്നെ ഇതിനകത്ത് എന്തുതരം വസ്തുക്കളാണ് ഉള്ളതെന്ന് വ്യക്തമല്ല. ഉള്ളിൽ നിന്ന് പൊട്ടിത്തെറികളും കേട്ടിരുന്നു. ഷെഡിന്റെ മുകൾ ഭാഗത്തെ ഷീറ്റ് പൂർണമായും കത്തിനശിച്ചു.