വില വളരെ കുറവാണ്,​ പക്ഷേ ഈ വീട് വാങ്ങണമെങ്കിൽ കുറച്ചു ധൈര്യം കൂടി വേണം

വളരെ കുറഞ്ഞ ചെലവിൽ വീട് വാങ്ങാനോ വയ്ക്കാനോ ആഗ്രഹിക്കുന്നവരാണ് പലരും. കുറഞ്ഞ ചെലവിൽ ഒരു വീട് വാങ്ങാൻ ആഗ്രഹിക്കുന്നവർ ഇത്തരം ഒരു അവസരം വീണു കിട്ടിയാൽ വേണ്ടെന്ന് വയ്ക്കില്ല. എന്നാൽ അത്തരക്കാരും ഈ വീട് വേണ്ടെന്ന് വച്ചേക്കും. അമേരിക്കയിലാണ് ഈ വീട്. ഏകദേശം ഒരു കോടി രൂപ മാത്രമാണ് ഈ വീടിന് വില. അമേരിക്കയിലെ വീടുകളുമായി താരതമ്യം ചെയ്യുമ്പോൾ വളരെ കുറ‌ഞ്ഞ വില വരുന്ന ഈ വീടിനെ പക്ഷേ ആരും തിരിഞ്ഞു പോലും നോക്കുന്നില്ല . എന്നുമാത്രമല്ല ആ പരിസരത്ത് പോലും വരാൻ കൂട്ടാക്കുന്നില്ല,​

പ്രേതഭവനം എന്ന് അക്ഷരാ‌ർത്ഥത്തിൽ പറയാവുന്ന ഒരു വീട് എന്നതാണ് ആൾക്കാർ ഓടിത്തള്ളുന്നതിന് പിന്നിലെ പ്രധാന കാരണം. വീട് ഒരുക്കിയിരിക്കുന്ന രീതിയാണ് ഈ ഭീകരതയ്ക്ക് പിന്നിൽ. സീലിങ്ങിൽ നിന്ന് തൂങ്ങിയാടുന്ന അസ്ഥികൂടങ്ങൾ,​ ശവപ്പെട്ടികൾ തുടങ്ങി പേടിപ്പെടുത്തുന്ന പലതും കണ്ടുവേണം ഇവിടെ താമസിക്കേണ്ടത്.

രണ്ടേക്കർ വരുന്ന സ്ഥലത്താണ് വീട് സ്ഥിതി ചെയ്യുന്നത്. വീടിന് മുന്നിൽ പൂന്തോട്ടമൊക്കെ ഉണ്ട്. പക്ഷേ ശ്മശാനത്തെ അനുസ്മരിപ്പിക്കുന്നതാണ് പൂന്തോട്ടത്തിന്റെ ലുക്ക്. ഇവിടുത്തെ ഫയർപ്ലേസ് ഒരു നിഗൂഢ വാതിലാണ്. ഈ വാതിൽ ചെന്ന് അവസാനിക്കുന്നത് നിറയെ തലയോട്ടികളുള്ള ഒരു അടുക്കളയിലാണ്. ഹോളിവുഡിലെ ഏറ്റവും പേടിപ്പെടുത്തുന്ന കഥാപാത്രങ്ങളുടെ മാസ്കുകളും ഇവിടെയുണ്ട്.

മൂന്ന് കിടപ്പുമുറികളും വീട്ടിലുണ്ട്. കൂടുതൽ ആളുകളെ ആകർഷിക്കുന്നതിന് വേണ്ടിയാണ് ഈ ഭീകര തീം ഒരുക്കിയത്,​ എന്നാൽ വീടിന് പരിസരത്ത് എത്തുന്നത് തന്നെ നെഗറ്റീന് വൈബ് ഉണ്ടാക്കും എന്ന കാരണത്താൽ കുറഞ്ഞ വിലയായിട്ടുപോലും ആളുകൾ വാങ്ങാൻ തയ്യാറാകുന്നില്ല. പ്രോപ്പർട്ടി സൈറ്റുകളിലും വീടിനെക്കുറിച്ച് മോശം കമന്റുകളാണ്.