പഴകിയ പന്നിയിറച്ചിയും ചിക്കനും ബീഫും പിടികൂടി; പിറവത്ത് എട്ട് ഹോട്ടലുകൾക്ക് നോട്ടീസ്, പിഴയും ഈടാക്കും

കൊച്ചി: പിറവത്ത് നഗരസഭ ഭക്ഷ്യ സുരക്ഷാ വിഭാഗം നടത്തിയ മിന്നൽ പരിശോധനയിൽ എട്ട് ഹോട്ടലുകളിൽ നിന്നായി പഴകിയ ഭക്ഷണം പിടിച്ചെടുത്തു. കട ഉടമകൾക്ക് ആരോഗ്യവകുപ്പ് നോട്ടീസ് നൽകി. ഇവർക്കെതിരെ പിഴയും ഈടാക്കും.

ഐശ്വര്യ ഹോട്ടലിൽ നിന്ന് പഴകിയ പുളിശേരി, ജാക്ക്രസ് കോഫി ഹൗസിൽ നിന്ന് പഴകിയ എണ്ണ, ബീഫ് കറി, കടലക്കറി, സിറ്റി ഹോട്ടലിൽ നിന്ന് ബീഫ് കറി, കുഞ്ഞൂഞ്ഞ് ഹോട്ടലിൽ നിന്ന് പന്നിയിറച്ചി, എണ്ണ, ഹോട്ടൽ ഹണീബിയിൽ നിന്ന് ചിക്കൻ അൽഫാം, ഫിഷ് ഫ്രൈ, ഹോട്ടൽ അഥീനയിൽ നിന്ന് ഫ്രൈഡ് റൈസ്, ശിവനന്ദ ബേക്കറിയിൽ നിന്ന് ബീഫ്, വിജയ ബേക്കറിയിൽ നിന്ന് പഴം ചിപ്സ് എന്നിവയാണ് പിടികൂടിയത്. കട ഉടമകൾക്ക് ആരോഗ്യ വിഭാഗം നോട്ടീസ് നൽകി. ഇവരിൽ നിന്ന് പിഴയും ഈടാക്കും.

ആകെ 15 സ്ഥാപനങ്ങളിലാണ് പരിശോധന നടത്തിയത്. നഗരസഭ സീനിയർ ഹെൽത്ത് ഇൻസ്പെക്ടർ ശ്രീകുമാർ എം ആർ, ജൂനിയർ ഹെൽത്ത് ഇൻസ്പെക്ടർമാരായ രശ്മി പി ആർ, ഉമേഷ് എൻ എസ് എന്നിവരുടെ നേതൃത്വത്തിലായിരുന്നു പരിശോധന. ഓരോ ദിവസങ്ങളിലും പരിശോധന കർശനമാക്കുമെന്ന് നഗരസഭ ആരോഗ്യവിഭാഗം അറിയിച്ചു.