തിരുവനന്തപുരം: ശ്രീകാര്യത്ത് പട്ടാപ്പകൽ വൃദ്ധയെ കടന്നുപിടിക്കാൻ ശ്രമിച്ചയാൾ പിടിയിൽ. വട്ടപ്പാറ സ്വദേശി ചിത്രസേനനാണ് പൊലീസിന്റെ പിടിയിലായത്. റോഡിലൂടെ നടന്നുപോകുകയായിരുന്ന വൃദ്ധയെ പിന്തുടർന്നായിരുന്നു ആക്രമണം.

ശ്രീകാര്യം - ഗാന്ധിപുരം റോഡിൽ ബുധനാഴ്ച ഉച്ചയ്ക്ക് രണ്ടരയോടെയാണ് സംഭവം. മകളുടെ വീട്ടിൽ പോയി മടങ്ങുകയായിരുന്ന 68കാരിയെയാണ് ചിത്രസേനൻ നടുറോഡിൽ വച്ച് കടന്നുപിടിച്ചത്. കഴുത്തിൽ ചുറ്റിപ്പിടിച്ചതോടെ കുതറി മാറാൻ ശ്രമിച്ചെങ്കിലും വൃദ്ധയെ സമീപത്തെ ഇടനാഴിയിൽ തള്ളിയിടാൻ ശ്രമിച്ചു. നിലവിളി കേട്ടെത്തിയ വഴിയാത്രക്കാരും സമീപവാസികളുമാണ് ചിത്രസേനനെ തടഞ്ഞുവച്ചത്. ശ്രീകാര്യം സ്റ്റേഷൻ പരിധിയിൽ 2020ൽ വധശ്രമകേസിലും ഇയാൾ പ്രതിയാണ്.