ഹരിതകർമ സേനയ്ക്ക് കുടുംബശ്രീ പിന്തുണ  

തിരുവനന്തപുരം: 'മാലിന്യ മുക്തം നവകേരളം' കാമ്പെയിനിന്റെ ഭാഗമായി ഹരിതകർമ സേനാംഗങ്ങൾക്ക് കുടുംബശ്രീയുടെ 46 ലക്ഷം അംഗങ്ങൾ 'ഞങ്ങൾ ഹരിതകർമ സേനയ്‌ക്കൊപ്പം' എന്ന് പിന്തുണ പ്രഖ്യാപിക്കും. നിലവിൽ ഹരിതകർമ സേന നൽകുന്ന വാതിൽപ്പടി സേവനങ്ങൾക്ക് ഉപഭോക്താക്കളിൽ നിന്നു ലഭിക്കുന്ന യൂസർ ഫീ കുറവായ സാഹചര്യത്തിലാണിത്. 10,11 തീയതികളിൽ ചേരുന്ന അയൽക്കൂട്ട യോഗങ്ങളിൽ ഹരിതകർമ സേനയ്ക്ക് പിന്തുണ പ്രഖ്യാപനം നടത്തും.

യോഗത്തിൽ പങ്കെടുക്കുന്നവർ തങ്ങളുടെ വീട്ടിൽ നിന്നും അജൈവ മാലിന്യം വൃത്തിയാക്കി ഹരിതകർമ സേനക്ക് നൽകുമെന്നും ലഭ്യമാകുന്ന സേവനത്തിന് നിയമാനുസൃതം സർക്കാർ നിശ്ചയിച്ചിട്ടുള്ള യൂസർ ഫീ നൽകുമെന്നും പ്രഖ്യാപിക്കും. എല്ലാ അയൽക്കൂട്ട അംഗങ്ങളുടെയും വീടുകളിൽ നിന്നും എല്ലാ മാസവും കൃത്യമായി ഹരിതകർമ സേനയ്ക്ക് യൂസർ ഫീസ് നൽകും. കുടുംബശ്രീ എക്സിക്യൂട്ടീവ് ഡയറക്ടർ ഇതു സംബന്ധിച്ച സർക്കുലർ ഇറക്കി.