വാരണാസി: തന്റെ മണ്ഡലത്തിൽ പുതിയ അന്താരാഷ്ട്ര ക്രിക്ക​റ്റ് സ്​റ്റേഡിയത്തിന് തറക്കല്ലിട്ട് പ്രധാനമന്ത്രി നരേന്ദ്ര മോദി. രാജതലബ് മേഖലയിലെ റിംഗ് റോഡിന് സമീപത്തായിട്ടാണ് പുതിയ സ്റ്റേഡിയം പണികഴിപ്പിക്കുക. പുതിയ സ്​റ്റേഡിയത്തിനായി സ്ഥലമേ​റ്റടുക്കാനായി 121 കോടിയാണ് സർക്കാർ ചിലവഴിച്ചത്. നിർമ്മാണ ചിലവ് 330 കോടിയാണ്. 2025 ഓടേ സ്‌​റ്റേഡിയത്തിന്റെ നിർമ്മാണം പൂർത്തിയാകുമെന്നാണ് റിപ്പോർട്ടുകൾ.ഈ സ്‌​റ്റേഡിയത്തിന് 30,000ൽ അധികം പേർക്ക് ഇരിക്കാനുളള സംവിധാനമൊരുക്കും. സ്​റ്റേഡിയത്തിന്റെ ഗ്യാലറി വാരണാസിയിലെ ഘട്ടുകളുടെ പടികളോട് സാമ്യമുളളവയായിരിക്കും.

ഇന്ന് നടന്ന തറക്കല്ലിടൽ ചടങ്ങിൽ പ്രധാന മന്ത്രിക്കൊപ്പം ഉത്തർപ്രദേശ് മുഖ്യമന്ത്രിയോഗി ആദിത്യനാഥ്, ക്രിക്ക​റ്റ് ഇതിഹാസം സച്ചിൻ ടെണ്ടുൽക്കറും രവി ശാസ്ത്രിയും പങ്കെടുത്തിരുന്നു. ബി സി സി ഐ പ്രസിഡന്റായ റോജർ ബിന്നി, വൈസ് പ്രസിഡന്റ് രാജീവ് ശുക്ല, സെക്രട്ടറി ജയ് ഷാ എന്നിവരും പങ്കെടുത്തു. ഉത്തർപ്രദേശിലെ മൂന്നാമത്തെ അന്താരാഷ്ട്ര ക്രിക്ക​റ്റ് സ്​റ്റേഡിയമാണിത്. മ​റ്റുളളവ കാൺപൂരിലും ലഖ്നൗവിലുമാണ് സ്ഥിതി ചെയ്യുന്നത്.