വർദ്ധിച്ചു വരുന്ന ജീവിതച്ചെലവും ഫീസിൽ കുത്തനെയുണ്ടാകുന്ന വർദ്ധനവും അമേരിക്കയിൽ ഉന്നത പഠനത്തിനെത്തുന്ന അന്താരാഷ്ട്ര വിദ്യാർത്ഥികളെ പ്രതികൂലമായി ബാധിക്കുന്നു. സ്‌കോളർഷിപ്/ഫെലോഷിപ്പ്/അസിസ്റ്റന്റ്ഷിപ് എന്നിവയില്ലാതെ വീട്ടിൽ നിന്നും പണം കണ്ടെത്തിയോ, ബാങ്ക് വായ്പയെടുത്തോ പഠിക്കുക എന്നത് ശരാശരി വിദ്യാർത്ഥികളെ സംബന്ധിച്ചിടത്തോളം തീർത്തും അപ്രാപ്യമാണ്. പാർട്ട് ടൈം തൊഴിലിനെ മാത്രം ആശ്രയിച്ചുള്ള ബഡ്ജറ്റിംഗും അപ്രായോഗികമാണ്. ഇന്ത്യയിൽ നിന്ന് ഉപരിപഠനത്തിനെത്തുന്ന വിദ്യാർത്ഥികളുടെ എണ്ണവും അനുദിനം വർദ്ധിച്ചുവരുന്നു.

സയൻസ്, ടെക്‌നോളജി, എൻജിനിയറിംഗ്, മാത്തമാറ്റിക്‌സ് അടങ്ങുന്ന STEM കോഴ്‌സുകൾ പഠിക്കാനാണ് വിദ്യാർത്ഥികൾ കൂടുതലായി അമേരിക്കയിലെത്തുന്നത്. പ്രസ്തുത മേഖലകളിൽ അഭ്യസ്തവിദ്യരുടെ ക്ഷാമം അമേരിക്കയിൽ 50 ശതമാനത്തിലേറെയാണ്. അമേരിക്കയിൽ ഉന്നതവിദ്യാഭ്യാസത്തിനെത്തുന്ന വിദ്യാർത്ഥികൾ 77 ശതമാനം പബ്ലിക് യൂണിവേഴ്‌സിറ്റികളിൽ പഠിക്കുമ്പോൾ 23 ശതമാനം മാത്രമാണ് സ്വകാര്യ സർവകലാശാലകളിലെത്തുന്നത്. സ്വകാര്യ യൂണിവേഴ്‌സിറ്റികളിൽ ട്യൂഷൻ ഫീസിൽ ഭീമമായ വർദ്ധനവുണ്ടായിട്ടുണ്ട്. അമേരിക്കയിൽ ബിരുദം പൂർത്തിയാക്കി തൊഴിൽ ചെയ്യുന്നവരുടെ വരുമാനത്തിന്റെ പകുതിയും ലോൺ തിരിച്ചടവിനാണ് വിനിയോഗിക്കുന്നത്.

അമേരിക്കയിലെ ഏഷ്യൻ വിദ്യാർത്ഥികളിലെ കടബാദ്ധ്യത 2016 ലെ 47.8 ശതമാനത്തിൽ നിന്ന് 2021 ൽ 66.3 ശതമാനമായി ഉയർന്നിട്ടുണ്ട്. ട്യൂഷൻ ഫീസിലെ വർദ്ധനവും വിദ്യാർത്ഥികൾക്ക് താങ്ങാവുന്നതിലധികമാണ്. നാലുവർഷ ബിരുദപ്രോഗ്രാമിൽ സർക്കാർ, സ്വകാര്യ സർവകലാശാലകളിലെ ഫീസ് യഥാക്രമം 9349, 32769 ഡോളറാണ്. അന്താരാഷ്ട്ര വിദ്യാർത്ഥികൾക്ക് മിക്ക സർവകലാശാലകളിലും വിവിധ സ്‌കോളർപ്പുകളോ സാമ്പത്തിക സഹായ പദ്ധതികളോ ഉണ്ട്. യൂണിവേഴ്‌സിറ്റി സ്‌കോളർഷിപ്പുകൾ, ഫിനാൻഷ്യൽ സ്‌കോളർഷിപ്പുകൾ, മെരിറ്റ്, വിവിധ രാജ്യങ്ങളിൽ നിന്നുള്ള വിദ്യാർത്ഥികൾക്കുള്ള സ്‌കോളർഷിപ്പുകൾ, സർക്കാർ/സ്വകാര്യ സ്‌കോളർഷിപ്പുകൾ എന്നിവ ഇവയിൽപ്പെടും. സ്‌കോളർഷിപ്പിന് അപേക്ഷിക്കുമ്പോൾ നിശ്ചിത തീയതിക്കകം അപേക്ഷിക്കണം. ഇതിനുമുമ്പ് തന്നെ അഡ്മിഷൻ ഓഫർ ലെറ്റർ ലഭിച്ചിരിക്കണം.

ഓരോ യൂണിവേഴ്‌സിറ്റിക്കും അവസാനതീയതി വ്യത്യാസപ്പെട്ടിരിക്കും. യൂണിവേഴ്‌സിറ്റി വെബ്‌സൈറ്റിലെ സ്‌കോളർഷിപ് പേജിൽ നിന്ന് പൂർണ വിവരങ്ങൾ, യോഗ്യത എന്നിവ അറിയാം. അമേരിക്കയിലെ സാമൂഹിക സംരംഭകത്വ സ്ഥാപനമായ 'ബ്രിഡ്ജ് 360" ഏഷ്യൻ രാജ്യങ്ങളിൽ നിന്നുള്ള വിദ്യാർത്ഥികൾക്ക് മികച്ച സർവകലാശാലകളിൽ പ്രവേശനം ലഭിക്കാൻ സൗജന്യ സേവനങ്ങളും, സ്‌കോളർഷിപ്/ ഫെലോഷിപ്പ് ലഭിക്കാനുള്ള നടപടിക്രമങ്ങളും ചെയ്തുവരുന്നു. ബ്രിഡ്ജ് 360ന്റെ ലിങ്കിലൂടെ അഡ്മിഷൻ താത്പര്യം അറിയിക്കാം. 48 മണിക്കൂറിനകം അമേരിക്കയിൽ നിന്നുള്ള ഇന്റർവ്യൂ പ്രതീക്ഷിക്കാം. തുടർന്ന് വിദ്യാർത്ഥിയുടെ താത്പര്യത്തിനിണങ്ങിയ സർവ്വകലാശാലയിലേക്ക് ഉപരിപഠനത്തിനായുള്ള നടപടിക്രമങ്ങളാരംഭിക്കും. പ്രവേശന നടപടികൾ സൗജന്യമായി നൽകുന്നതോടൊപ്പം സർവ്വകലാശാലകളിലേക്ക് സ്‌കോളർപ്പിനും ശുപാർശ ചെയ്യും. നിരവധി അമേരിക്കൻ സർവ്വകലാശാലകളിലേക്ക് സ്‌കോളർഷിപ്പിന് അപേക്ഷിക്കാൻ ബ്രിഡ്ജ് 360 അപേക്ഷ ക്ഷണിച്ചിട്ടുണ്ട്.

അഡ്മിഷൻ നടപടിക്രമങ്ങൾ പൂർത്തിയാക്കുന്നതോടൊപ്പം സ്‌കോളർപ്പിനായി അപേക്ഷിക്കാം. ബിരുദ, ബിരുദാനന്തര പ്രോഗ്രാമുകൾക്ക് ഇപ്പോൾ അപേക്ഷിക്കാം. studyinUSA@bridg360.com, www.bridg360.com