ബി.ജെ.പിയെ വിമർശിച്ച് ആർ.എസ്.എസ് നേതാവ് 'അഹങ്കാരം പിടിച്ച പാർട്ടിയെ ശ്രീരാമൻ 241ൽ തളച്ചു' 'ഇന്ത്യ' മുന്നണി രാമവിരുദ്ധരെന്ന് കുറ്റപ്പെടുത്തിയും ആർ.എസ്.എസ് നേതാവ്

ന്യൂഡൽഹി: തിരഞ്ഞെടുപ്പിൽ തിരിച്ചടി നേരിട്ട ബി.ജെ.പിക്കെതിരെ രൂക്ഷവിമർശനവുമായി ആ‌ർ.എസ്.എസ് നേതാവ്.

രാമഭക്തി കാട്ടുകയും എന്നാൽ അഹങ്കാരികളായി മാറുകയും ചെയ്‌ത പാർട്ടിയെ ശ്രീരാമൻ 241ൽ തളച്ചുവെന്ന് ആർ.എസ്.എസ് ദേശീയ നിർവാഹക സമിതി അംഗം ഇന്ദ്രേഷ് കുമാർ പറഞ്ഞു. ഏറ്റവും വലിയ പാ‌ർട്ടിയെന്ന നിലയിലെത്തിച്ചു. എന്നാൽ, കിട്ടേണ്ടിയിരുന്ന വോട്ടും അധികാരവും അവരുടെ അഹങ്കാരം കാരണം ഈശ്വരൻ തടഞ്ഞു. രാമനോട് ഭക്തിയില്ലാത്തവരെ 234ൽ കെട്ടിയിട്ടുവെന്ന് 'ഇന്ത്യ"മുന്നണിയെ പരാമ‌ർശിച്ചും ഇന്ദ്രേഷ് കുമാർ പറഞ്ഞു. ദൈവനീതി സത്യവും ആസ്വാദ്യകരവുമാണെന്ന് കൂട്ടിച്ചേർത്തു. ജയ്‌പൂർ കനോട്ടയിൽ സംഘടിപ്പിച്ച രാംരഥ് അയോദ്ധ്യ യാത്ര ദർശൻ പൂജാ സമാരോഹ് ചടങ്ങിൽ സംസാരിക്കുകയായിരുന്നു ഇന്ദ്രേഷ് കുമാർ. പരാമർശം വിവാദമായതോടെ ഇത്തരം കാര്യങ്ങൾ പറയുന്നവർ സ്വയം ചിന്തിക്കണമെന്ന് കേന്ദ്രമന്ത്രി ജിതൻ റാം മാഞ്ചി പറഞ്ഞു. ആർ.എസ്.എസിനെ ആരാണ് ഗൗരവത്തിലെടുക്കുന്നതെന്ന് കോൺഗ്രസ് നേതാവ് പവൻ ഖേര പ്രതികരിച്ചു.