തിരുവനന്തപുരം: എ.പി.ജെ അബ്ദുൽകലാം സാങ്കേതിക ശാസ്ത്ര സർവകലാശാലയുടെ ബിരുദഫലം പ്രസിദ്ധീകരിച്ചു. ബി.ടെക്,ആർക്കിടെക്ചർ,ബി.എച്ച്.എം.സി.ടി (ബാച്ലർ ഒഫ് ഹോട്ടൽ മാനേജ്മന്റ് ആൻഡ് കേറ്ററിംഗ് ടെക്നോളജി),രണ്ടാം ബി ഡെസ് (ബാച്ലർ ഒഫ് ഡിസൈൻ) എന്നിവയുടെ ഫലമാണ് പ്രസിദ്ധീകരിച്ചത്. ബി.ടെക് പരീക്ഷയിൽ 53.03 വിജയശതമാനം നേടിയപ്പോൾ ബിആർക്-71.28,ബി.എച്ച്.എം.സി.ടി - 73.13,ബി ഡെസ് -65.79ആണ് വിജയശതമാനം.
വിജയികളായ വിദ്യാർത്ഥികളുടെ പ്രൊവിഷണൽ സർട്ടിഫിക്കറ്റുകളും ഗ്രേഡ് കാർഡുകളും വിദ്യാർത്ഥികളുടെ പോർട്ടലിൽ നിന്നും ഡൗൺലോഡ് ചെയ്യാം. ബിരുദ സർട്ടിഫിക്കറ്റിനുള്ള അപേക്ഷകൾ 28 മുതൽ സ്വീകരിക്കും.
ബി.ടെക്
128 എൻജിനിയറിംഗ് കോളേജുകളിലായി പരീക്ഷയെഴുതിയ 27,000 വിദ്യാർത്ഥികളിൽ 14,319 പേർ വിജയിച്ചു. ഇതിൽ 10,229 പെൺകുട്ടികളിൽ 6,921 പേരും 16,771 ആൺകുട്ടികളിൽ 7,398 പേരും വിജയം നേടി. പട്ടികജാതിപട്ടികവർഗ വിഭാഗത്തിൽ പരീക്ഷയെഴുതിയ 1,012 വിദ്യാർത്ഥികളിൽ 262 പേർ (25.89 ശതമാനം). ലാറ്ററൽ എൻട്രി വിഭാഗത്തിൽ 2,487 വിദ്യാർത്ഥികളിൽ 1,181 പേർ (47.49) ബി ടെക് നേടി.
ഒൻപതിന് മുകളിൽ സ്കോർ നേടിയ വിദ്യാർത്ഥികൾ 1117.
ടി.കെ.എം കോളജ് ഒഫ് എൻജിനിയറിംഗിലെ സിവിൽ എൻജിനിയറിംഗ് വിദ്യാർത്ഥിനി ബീമ ജിഹാൻ (9.95),ബാർട്ടൺ ഹില്ലിലെ എൻജിനിയറിംഗ് കോളേജിലെ ഇലക്ട്രോണിക്സ് ആൻഡ് കമ്മ്യൂണിക്കേഷൻസ് എൻജിനിറിംഗ് വിദ്യാർത്ഥിനി അപർണ എസ്. (9.88),ടി.കെ.എം കോളേജ് ഒഫ് എൻജിനിറിംഗിലെ ഇലക്ട്രോണിക്സ് ആൻഡ് കമ്മ്യൂണിക്കേഷൻസ് എൻജിനിറിംഗ് വിദ്യാർത്ഥിനി അശ്വതി ഇ (9.87) എന്നിവരാണ് ആദ്യ മൂന്ന് സ്ഥാനക്കാർ.
ഉയർന്ന വിജയശതമാനം
ലഭിച്ച കോളേജുകൾ
കോളേജ് ഒഫ് എൻജിനിയറിംഗ്,തിരുവനന്തപുരം (88.34)
ഗവൺമെന്റ് എൻജിനിയറിംഗ് കോളേജ്,തൃശൂർ (76.65)
ടി.കെ.എം കോളേജ് ഒഫ് എൻജിനിയറിംഗ്,കൊല്ലം (76.59)
എൻ.എസ്.എസ് കോളേജ് ഒഫ് എൻജിനിയറിംഗ്,പാലക്കാട് (76.16)
എം.എ കോളേജ് ഓഫ് എൻജിനിയറിംഗ്,കോതമംഗലം (74.88)
ബി ആർക്
ആർക്കിടെക്ചർ ബാച്ച് 71.28 വിജയശതമാനമാണ് കൈവരിച്ചത്. കഴിഞ്ഞവർഷം 53.45 ആയിരുന്നു വിജയശതമാനം
ഉയർന്ന വിജയശതമാനമുള്ള കോളേജുകൾ കോളേജ്: ഒഫ് എൻജിനിയറിംഗ് തൃശൂർ (92.5),കോളേജ് ഒഫ് എൻജിനിയറിംഗ് തിരുവനന്തപുരം (91.18),ടി.കെ.എം കോളേജ് ഓഫ് എൻജിനീയറിംഗ് (84.29).
സ്വന്തം കോളേജുകൾ ഈ വർഷം മുതൽ
നൂതന എൻജിനിയറിംഗ് മേഖലകളിൽ നാല് പോസ്റ്റ് ഗ്രാജ്വേറ്റ് പ്രോഗ്രാമുകൾ തുടങ്ങാനുള്ള എ.ഐ.സി.റ്റി.ഇ അനുമതി എ.പി.ജെ അബ്ദുൽ കലാം സാങ്കേതിക സർവകലാശാലയ്ക്ക് ലഭിച്ചു. സർവകലാശാല സ്വന്തം ക്യാമ്പസ് ആരംഭിക്കുന്നതിന്റെ ആദ്യപടിയായിട്ടാണ് ഈ കോഴ്സുകൾ തുടങ്ങുന്നത്. പി എച്ച് ഡി,പോസ്റ്റ് ഡോക്ടറൽ കോഴ്സുകളും ആരംഭിക്കുന്നതിനുള്ള നടപടികൾ പൂർത്തിയായി വരുന്നു.
എം.ടെക് ഇലക്ട്രിക് വെഹിക്കിൾ ടെക്നോളജി,എം.ടെക് എംബെഡെഡ്ഡ് സിസ്റ്റംസ് ടെക്നോളജി,എം.ടെക് ഇൻഫ്രാസ്ട്രക്ചർ എൻജിനിയറിംഗ് ആൻഡ് മാനേജ്മെന്റ്,എം.ടെക് മെക്കാനിക്കൽ ആൻഡ് മെറ്റീരിയൽസ് ടെക്നോളജി എന്നിവയാണ് ഈ വർഷം ആരംഭിക്കുന്ന പ്രോഗ്രാമുകൾ.
ഓരോ പ്രോഗ്രാമുകൾക്കും 18 സീറ്റുകളാണ് അനുവദിച്ചിട്ടുള്ളത്. ഗേറ്റ് സ്കോർ,അല്ലെങ്കിൽ ദേശീയ തലത്തിലുള്ള യോഗ്യതാ പരീക്ഷകളിൽ ലഭിച്ച മാർക്കിന്റെ അടിസ്ഥാനത്തിലാകും പ്രവേശനം.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |