ഡെറാഡൂൺ: ഉത്തരാഖണ്ഡിലെ മിന്നൽ പ്രളയത്തിൽ വൻ നാശനഷ്ടം. ഹരിദ്വാറിൽ ഗംഗാനദി കരകവിഞ്ഞ് ഒഴുകി. ഗംഗയുടെ കൈവഴിയായ സുഖി നദീതീരത്ത് ബസുകളും കാറുകളുമുൾപ്പെടെ നിരവധി വാഹനങ്ങൾ ഒഴുകിപ്പോയി. ഗംഗയിൽ ഇറങ്ങുന്നതിന് വിലക്ക് ഏർപ്പെടുത്തി. അടുത്ത മൂന്ന് ദിവസംകൂടി ഉത്തരാഖണ്ഡിൽ മഴ തുടരുമെന്നാണ് കാലാവസ്ഥ വകുപ്പിന്റെ മുന്നറിയിപ്പ്. വീടുകളിലും സ്ഥാപനങ്ങളിലും വെള്ളം കയറി. പ്രധാന റോഡുകൾ മുങ്ങി. കോട്വാളി മേഖലയെ ആണ് വെള്ളപ്പൊക്കം കൂടുതൽ ബാധിച്ചത്. ജലനിരപ്പ് ഇനിയും ഉയരാൻ സാദ്ധ്യതയുണ്ടെന്നാണ് മുന്നറിയിപ്പ്. തീർത്ഥാടകരുൾപ്പെടെ നദിയിൽ ഇറങ്ങരുതെന്ന് പൊലീസ് നിർദ്ദേശം നൽകി. അടുത്ത മാസം നാല് വരെ ഉത്തരാഖണ്ഡിൽ കനത്ത മഴ തുടരുമെന്നാണ് കേന്ദ്ര കാലാവസ്ഥാ വകുപ്പിന്റെ പ്രവചനം.
ഉത്തരേന്ത്യയിൽ പലയിടത്തും ശക്തമായ മഴയാണ്. ഹിമാചൽ പ്രദേശ്, ഉത്തരാഖണ്ഡ്, പഞ്ചാബ്, ഹരിയാന,ചണ്ഡീഗർ, ഡൽഹി, ഉത്തർപ്രദേശ്, മദ്ധ്യപ്രദേശ്, രാജസ്ഥാൻ എന്നിവിടങ്ങളിൽ അടുത്ത നാലോ അഞ്ചോ ദിവസങ്ങളിൽ അതിശക്ത മഴ പെയ്യുമെന്ന് കാലാവസ്ഥാ വകുപ്പ് അറിയിച്ചു.
കേദാർനാഥിൽ വൻ ഹിമപാതം
ഉത്തരാഖണ്ഡിൽ ഗാന്ധി സരോവറിന് മുകളിലായി വൻ ഹിമപാതം. കേദാർനാഥ് ക്ഷേത്രത്തിന് പിറകിലായാണ് ഹിമാപാതമുണ്ടായത്. ഇന്നലെ രാവിലെ അഞ്ചിനായിരുന്നു സംഭവം. കേദാർനാഥ് ധാമിന് പിറകിലുള്ള പർവ്വതച്ചെരുവിലൂടെ ഹിമപാതം ഒഴുകി വരുന്നതിന്റെ ദൃശ്യങ്ങൾ പി.ടി.ഐ പങ്കുവച്ചു. ആളപായമോ നാശനഷ്ടമോ ഇല്ല. മഞ്ഞുവീഴ്ചയുള്ള സമയങ്ങളിൽ ഈ പ്രദേശത്ത് ഹിമപാതം ശക്തമാണെന്ന് അധികൃതർ അറിയിച്ചു.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |