അമേരിക്കൻ ശതകോടീശ്വരൻ ജെയിംസ് ക്ലൈൻ ആത്മഹത്യ ചെയ്തു

ന്യൂയോർക്ക്: യു.എസിലെ പ്രമുഖ വ്യവസായിയും ശതകോടീശ്വരനുമായ ജെയിംസ് മൈക്കൽ ക്ലൈൻ (64) ഹോട്ടലിന്റെ ഇരുപതാം നിലയിൽനിന്ന് ചാടി ആത്മഹത്യ ചെയ്തു. പ്രാദേശിക സമയം ചൊവ്വാഴ്ച രാവിലെ 10.19ന് മാൻഹ​ട്ടണിലെ കിംബർലി ഹോട്ടലിലായിരുന്നു സംഭവം. ആത്മഹത്യാ കുറിപ്പ് കണ്ടെത്തി. യു.എസിൽ സിനിമ ടിക്കറ്റുകളുടെ വിൽപ്പന നടത്തുന്ന ഫാൻഡാൻഗോ മീഡിയ കമ്പനിയുടെ സ്ഥാപകനാണ് ജെയിംസ്. 2000ത്തിൽ സ്ഥാപിച്ച കമ്പനിയെ 2016ൽ എൻ.ബി.സി യൂണിവേഴ്‌സലും വാർണർ ബ്രദേഴ്‌സും ഏ​റ്റെടുത്തിരുന്നു. ഫാൻഡാൻഗോയിൽ ജെയിംസ് നിക്ഷേപം നടത്തിയിരുന്നു. മറ്റ് നിരവധി സംരംഭങ്ങൾക്കും ടെക് കമ്പനികൾക്കും അദ്ദേഹം തുടക്കം കുറിച്ചു.

കോർണൽ യൂണിവേഴ്‌സി​റ്റിയിൽ നിന്ന് ബിരുദം നേടിയ അദ്ദേഹം ഹാർവഡ് ബിസിനസ് സ്‌കൂളിൽ നിന്ന് എം.ബി.എ സ്വന്തമാക്കിയിരുന്നു. മൃഗസംരക്ഷണ പ്രവർത്തകൻ കൂടിയായിരുന്ന അദ്ദേഹം നാഷണൽ ഫിഷ് ആൻഡ് വൈൽഡ് ലൈഫ് ഫൗണ്ടേഷന്റെ മുൻ ചെയർമാനാണ്. പമേലയാണ് ഭാര്യ. 6 മക്കളുണ്ട്. 2020ൽ ഫ്ലോറിഡയിൽ ജെയിംസ് 2 കോടിയിലധികം ഡോളർ വിലമതിക്കുന്ന ആഡംബര വസതി സ്വന്തമാക്കിയത് വാർത്തയായിരുന്നു.