വർക്കല: കാൽനടയാത്രക്കാരായ മൂന്ന് പേരെ അമിത വേഗത്തിലെത്തിയ കാർ ഇടിച്ചു തെറിപ്പിച്ചു. ശനിയാഴ്ച രാത്രി 9.40 ഓടെ കുരയ്ക്കണ്ണി- ഓടയം റോഡിൽ തിനവിള ക്ഷേത്രത്തിന് സമീപമാണ് സംഭവം. കുരയ്ക്കണ്ണി ഓടയം അൽമഹലിൽ നബീല(38), സഹോദരിയുടെ മകൾ ജന്നത് സാബു(18),​ നബീലയുടെ മകൻ അദ്നാൻ അൻസാർ (15)​ എന്നിവർക്കാണ് പരിക്കേറ്റത്. വാരിയെല്ലിനും ഇടുപ്പിനും കാലുകൾക്കും ഗുരുതരമായി പരിക്കേറ്റ നബീല,​ കൈക്കും തലയ്ക്കും പരിക്കേറ്റ ജന്നത് സാബു എന്നിവർ തിരുവനന്തപുരത്തെ സ്വകാര്യ ആശുപത്രിയിൽ ചികിത്സയിലാണ്. അദ്നാൻ നിസാരപരിക്കുകളോടെ രക്ഷപെട്ടു. അമിത വേഗതയിലെത്തിയ മാരുതി ഓൾട്ടോ കാർ ഇവരെ ഇടിച്ച് തെറിപ്പിക്കുകയായിരുന്നുവെന്ന് ദൃക്‌സാക്ഷികൾ പറയുന്നു. അപകടശേഷം നിറുത്താതെ പോയ വാഹനം നാട്ടുകാർ തടഞ്ഞ് പൊലീസിലേല്പിച്ചു. അശ്രദ്ധമായി വാഹനമോടിച്ചതിന് ഡ്രൈവർ അനാഫിക്കെതിരെ പൊലീസ് കേസെടുത്തു.