5.5 കിലോ കഞ്ചാവ് പിടികൂടി

ഷൊർണൂർ: റെയിൽവേ സ്റ്റേഷനിൽ ട്രെയിനുള്ളിൽ നിന്നും 5.5 കിലോ കഞ്ചാവ് പിടികൂടി. ഇന്നലെ ഉച്ചയ്ക്ക് ഒരു മണിക്ക് ഷൊർണൂരിലെത്തിയ മംഗലാപുരം-ചെന്നൈ എഗ്മോർ എക്സ്പ്രസിൽ നടത്തിയ പരിശോധനയിലാണ് സീറ്റിന് അടിയിൽ നിന്നും ബാഗിൽ സൂക്ഷിച്ച കഞ്ചാവ് കണ്ടെത്തിയത്. റെയിൽവേ പൊലീസ് എസ്.ഐ അനിൽ മാത്യുവിന്റെ നേതൃത്വത്തിലുള്ള പരിശോധനയിലാണ് കഞ്ചാവ് കണ്ടെടുത്തത്. ഏഴ് മാസത്തിനുള്ളിൽ ഷൊർണൂരിൽ ട്രെയിനിനുള്ളിൽ നിന്ന് 50 കിലോ കഞ്ചാവ് ലഭിച്ചിട്ടുണ്ടെന്ന് എസ്‌.ഐ അനിൽ മാത്യു പറഞ്ഞു. മറ്റു സംസ്ഥാനങ്ങളിൽ നിന്നും കഞ്ചാവ് ഇവിടെ എത്തിച്ച് ഇരട്ടി വിലക്ക് വിൽക്കുന്ന സംഘമാണ് പിന്നിലെന്ന് പൊലീസ് പറഞ്ഞു. 12 കേസുകൾ രജിസ്റ്റർ ചെയ്‌തെങ്കിലും പ്രതികളെ കണ്ടെത്തിയിട്ടില്ല. പരിശോധനയിൽ എസ്.ഐ ടി.ബാബു, ഗോകുൽ, സുരേഷ്, സുമേഷ്, സുഭാഷ് എന്നിവരും ഒപ്പമുണ്ടായിരുന്നു.