പത്താം ക്ളാസ് പാസായവർക്ക് പരീക്ഷയില്ലാതെ കേന്ദ്ര സർക്കാർ ജോലി നേടാം; ഓഗസ്റ്റ് അഞ്ചിന് മുൻപ് അപേക്ഷിക്കണം

തപാൽ വകുപ്പിൽ ഗ്രാമീൺ ഡാക് സേവക് തസ്തികയിൽ അപേക്ഷിക്കാം. പോസ്റ്റ് മാസ്റ്റർ, അസിസ്റ്റന്റ് ബ്രാഞ്ച് പോസ്റ്റ് മാസ്റ്റർ തസ്തികകളിലാണ് നിയമനം. കേരള സർക്കിളിൽ 2433 ഒഴിവുകളുണ്ട്. 10-ാം ക്ലാസ് പാസായവർക്ക് അപേക്ഷിക്കാം.

ബ്രാഞ്ച് പോസ്റ്റ് മാസ്റ്റർക്ക് 12,000 -29,380 രൂപയും, അസിസ്റ്റന്റ് ബ്രാഞ്ച് പോസ്റ്റ്മാസ്റ്റർക്ക് 10,000- 24,470 രൂപയുമാണ് ശമ്പളം.യോഗ്യത: കണക്കും ഇംഗ്ലീഷും ഉൾപ്പെട്ട പത്താം ക്ലാസ് ജയം. കമ്പ്യൂട്ടർ പരിജ്ഞാനം നിർബന്ധം.സൈക്ലിംഗ് അറിയണം. പ്രായപരിധി: 18-40. ഉയർന്ന പ്രായപരിധിയിൽ സംവരണ വിഭാഗക്കാർക്ക് നിയമാനുസൃത ഇളവുണ്ട്.

ബ്രാഞ്ച് പോസ്റ്റ് മാസ്റ്ററായി നിയമനം ലഭിക്കുന്നവർ പോസ്റ്റ് ഓഫീസ് പ്രവർത്തിക്കുന്ന വില്ലേജിലും അസിസ്റ്റന്റ് പോസ്റ്റ് മാസ്റ്റർ അതേ പോസ്റ്റ് ഓഫീസുകളുടെ അധികാരപരിധിക്കകത്തും താമസിക്കണം.

ഒഴിവുള്ള കേരള സർക്കിളിലെ ഡിവിഷനുകൾ: ആലപ്പുഴ, ആലുവ, കോഴിക്കോട്, കണ്ണൂർ, ചങ്ങനാശേരി, എറണാകുളം, ഇടുക്കി, ഇരിങ്ങാലക്കുട, കോട്ടയം, കാസർഗോഡ്, ലക്ഷദ്വീപ്, മഞ്ചേരി, മാവേലിക്കര, ഒറ്റപ്പാലം, പാലക്കാട്, പത്തനംതിട്ട, കൊല്ലം, ആർ.എം.എസ്.സി.ടി - കോഴിക്കോട്, ആർ. എം. എസ്. എറണാകുളം, ആർ.എം.എസ്.ടി.വി തിരുവനന്തപുരം, തലശേരി, തിരൂർ, തിരുവല്ല, തൃശൂർ, തിരുവനന്തപുരം സൗത്ത്, തിരുവനന്തപുരം നോർത്ത്, വടകര.

പത്താം ക്ലാസ് മാർക്കിന്റെ അടിസ്ഥാനത്തിൽ തയ്യാറാക്കുന്ന റാങ്ക് ലിസ്റ്റനുസരിച്ചാണ് തിരഞ്ഞെടുപ്പ്. മെറിറ്റ് ലിസ്റ്റിൽ ഒരേ റാങ്കിൽ വന്നാൽ ഉയർന്ന പ്രായക്കാർക്ക് മുൻഗണന നൽകും.വിശദ വിവരങ്ങൾക്കും അപേക്ഷിക്കാനും www.indiapostgdsonline.gov.in സന്ദർശിക്കുക. അവസാന തീയതി: 05.08.2024.