കുറുകി നടക്കുന്ന പ്രാവ് അത്ര പാവത്താനല്ല, ശ്രദ്ധിച്ചില്ലെങ്കിൽ ശ്വാസകോശത്തിനുണ്ടാകുക വലിയ പ്രശ്‌നങ്ങൾ

മനുഷ്യരുമായി വളരെയധികം അടുത്ത് കഴിയുന്ന ജീവികളിലൊന്നാണ് പ്രാവുകൾ. വീടുകളിലെ സൺഷെയ്‌ഡ്, ബാൽക്കണി, മനുഷ്യർ ഒത്തുകൂടുന്ന ചന്തകൾ, ആരാധനാലയങ്ങൾ തുടങ്ങി എവിടെയും ധാന്യങ്ങളും മറ്റും കൊത്തിത്തിന്ന് കുറുകിക്കൊണ്ട് നടക്കാറുള്ള പക്ഷിയാണിവ. കാണാൻ കൗതുകമുണ്ടെങ്കിലും ഏറെനാൾ ഇവയുമായുള്ള സമ്പർക്കം ശ്വാസകോശ രോഗങ്ങൾക്ക് കാരണമാകുമെന്നാണ് പഠനങ്ങൾ വെളിവാക്കുന്നത്. പ്രാവിന്റെ കാഷ്‌ഠം, അവ ഉണങ്ങിയതിന്റെ പൊടി, തൂവൽ എന്നിവ ശ്വാസകോശ സംബന്ധമായ തകരാറുകൾക്കും പ്രശ്നങ്ങൾക്കും കാരണമാകും.

പ്രാവിൻകാഷ്‌ഠം നിറഞ്ഞ ഒരു വീട്ടിലെ വീട്ടമ്മയ്‌ക്ക് ശ്വാസകോശം മാറ്റിവയ്‌ക്കൽ ശസ്‌ത്രക്രിയ വേണ്ടിവന്നു. ഇതിന്കാരണം പ്രാവ് ആണെന്ന് കണ്ടെത്തിയ ആശുപത്രിയിലെ ഡോക്‌ടർമാർ വീടും പരിസരവും നല്ല വൃത്തിയായി സൂക്ഷിക്കണമെന്ന മുന്നറിയിപ്പും നൽകി. പ്രാവുകൾക്ക് ആഹാരം നൽകുമ്പോൾ അവ കൂട്ടമായി ഒരു പ്രദേശത്ത് താമസിച്ചുതുടങ്ങും എന്നാണ് പഠനത്തിൽ പറയുന്നത്. സ്വാഭാവികമായും അവിടെ അവയുടെ കാഷ്‌ഠവും ഉണ്ടാകും. ഈ കാഷ്‌ഠത്തിൽ നിന്നും ഉണ്ടാകുന്ന ഒരു ഫംഗസ് ദീർഘനാൾ കൊണ്ട് ശ്വാസകോശം തകരാറാകുന്നതിനും രോഗം ബാധിക്കുന്നതിനും കാരണമാകും.

ശ്രീഗംഗാറാം ആശുപത്രിയിലെ ഡോക്‌ടർമാർ ദേശീയ മാദ്ധ്യമമായ ഇന്ത്യാ ടുഡേയോട് വ്യക്തമാക്കിയത് അനുസരിച്ച് പ്രാവിന്റെ കാഷ്‌ഠവും മറ്റും ഹൈപ്പർസെൻസിറ്റിവിറ്റി ന്യൂമോണിറ്റിസ് എന്ന അലർജി രോഗത്തിന് കാരണമാകും. ഇന്ന് ശ്വാസകോശകലകളിൽ മുറിവുണ്ടാക്കുന്ന ഗുരുതര രോഗം വരുത്തും.

ക്രിപ്‌റ്റോകോക്കസ് എന്ന ഫംഗസാണ് പ്രാവിന്റെ കാഷ്‌ഠത്തിലുണ്ടാകുക. ഇവ മൂലമുണ്ടാകുന്ന ക്രിപ്‌റ്റോ‌കോ‌ക്കോസിസ് എന്ന രോഗം സ്ഥിരമായി പ്രാവുമായി സമ്പർക്കമുള്ളവർക്ക് വരാറുണ്ട്. പ്രാവുമായി നേരിട്ട് സമ്പർക്കം വരാതിരിക്കാൻ ശ്രദ്ധിക്കുക എന്നതാണ് ഈ രോഗങ്ങൾ ബാധിക്കാതിരിക്കാൻ ചെയ്യേണ്ടത്. വീട്ടിൽ ജനാലകളിലും സൺഷേഡിലും മറ്റും നെറ്റടിച്ച് വഴിയടക്കുന്നത് ഉചിതമാണ്. കൃത്യമായ കാലയളവിൽ ഇവ പുതുക്കുകയും വേണം.