വധശ്രമം : പ്രതികൾ അറസ്റ്റിൽ

തൃശൂർ : നെടുപുഴ സ്വദേശിയായ യുവാവിനെ ഭീഷണിപ്പെടുത്തി കുത്തിപ്പരിക്കേൽപ്പിച്ച കേസിലെ പ്രതികളായ നെടുപുഴ സ്വദേശിയായ കൊമ്പൻ ലൈനിൽ ചെമ്പൂരി വീട്ടിൽ സുബി എന്നു വിളിക്കുന്ന അരുൺ (32), കോടന്നൂർ ചാക്യാർക്കടവ് സ്വദേശിയായ മേച്ചേരി വീട്ടിൽ അജിത്ത് (40) എന്നിവരെ നെടുപുഴ പൊലീസും എ.സി.പി: സലീഷ് എൻ. ശങ്കരന്റെ നേതൃത്വത്തിലുള്ള സ്‌ക്വാഡും ചേർന്ന് അറസ്റ്റ് ചെയ്തു.
ബുധനാഴ്ച്ച വൈകിട്ടാണ് കേസിനാസ്പദമായ സംഭവം. നെടുപുഴ ക്രിസ്ത്യൻ പളളിക്ക് സമീപം വച്ച് പ്രതികൾ കൊല്ലുമെന്ന് ഭീഷണിപ്പെടുത്തി നെടുപുഴ സ്വദേശിയെ കുത്തി ഗുരുതരമായി പരിക്കേൽപ്പിക്കുകയായിരുന്നു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.