പി.പി. ദിവ്യ അന്വേഷണത്തോട് സഹകരിച്ചില്ല: നവീനിന്റെ കുടുംബം ജാമ്യ ഹർജിയിലെ വാദങ്ങൾ

കണ്ണൂർ: പി.പി.ദിവ്യയുടെ ജാമ്യാപേക്ഷയെ എതിർത്ത് നവീൻബാബുവിന്റെ കുടുംബവും പ്രോസിക്യൂഷനും ഉന്നയിച്ചത് ശക്തമായ വാദങ്ങൾ. പ്രതിഭാഗത്തിന്റെ ഓരോ വാദങ്ങളെയും ഖണ്ഡിച്ചു.

പ്രതിഭാഗം

എ.ഡി.എം കൈക്കൂലി വാങ്ങിയെന്ന വാദത്തിന് തെളിവാണ് കൈക്കൂലി നൽകിയതിന് പെട്രോൾ പമ്പ് അപേക്ഷകൻ പ്രശാന്തനെ ജോലിയിൽനിന്ന് സസ്‌പെൻഡ് ചെയ്തത്

എ.ഡി.എം പ്രശാന്തനെ ഫോണിൽവിളിച്ച് സംസാരിച്ചു. ഇരുവരും തമ്മിൽ കണ്ടു

ഒക്ടോബർ അഞ്ചിന് പ്രശാന്തൻ സഹകരണബാങ്കിൽ നിന്ന് ഒരുലക്ഷം രൂപ സ്വർണ വായ്പയെടുത്തതും ആറിന് ഇരുവരും ഒരേടവർ ലൊക്കേഷനിൽ ഉണ്ടായതും സാഹചര്യ തെളിവാണ്

കളക്ടറുടെ മൊഴി മുൻകൂർ ജാമ്യാപേക്ഷ പരിഗണിക്കവേ പ്രോസിക്യൂഷൻ ശ്രദ്ധയിൽപെടുത്തിയില്ല. കളക്ടറുടെ മൊഴി രേഖപ്പെടുത്തിയതിന്റെ വീഡിയോ ദൃശ്യം പരിശോധിക്കണം
ആത്മഹത്യയിലേക്ക് നയിക്കണമെന്ന ഉദ്ദേശ്യം ഉണ്ടായിരുന്നില്ലെന്ന് മുൻകൂർജാമ്യം തള്ളിയ വിധിയിൽ പറഞ്ഞിട്ടുണ്ട്

അമ്മ ജയിലിൽ കിടക്കുന്നതിനാൽ ദിവ്യയുടെ വിദ്യാർത്ഥിയായ മകൾക്ക് പ്രയാസമുണ്ട്. ദിവ്യയുടെ അച്ഛന്റെ ആരോഗ്യസ്ഥിതി മോശമാണ്. അന്വേഷണവുമായി സഹകരിച്ചു. തുടർന്നും സഹകരിക്കും. ഏത് ഉപാധിയും അംഗീകരിക്കാൻ തയ്യാറാണ്.

പ്രോസിക്യൂഷൻ

ഫോൺ വിളിച്ചാൽ കൈക്കൂലി വാങ്ങിയെന്നാകുമോ. പ്രശാന്തൻ ബാങ്കിൽ നിന്ന് വായ്പയെടുത്തത് കൈക്കൂലി നൽകാനാണെന്ന് പറയാൻ തെളിവെന്താണ്

19-ാം വയസിൽ സർവീസിൽ പ്രവേശിച്ച നവീൻബാബുവിനെ കുറിച്ച് കൈക്കൂലി ആരോപണങ്ങൾ ഉണ്ടായിട്ടേയില്ല. ഫയലിൽ ഒരു കാലതാമസവും ഉണ്ടായിട്ടില്ല

പണം നൽകിയെന്നതിന് തെളിവുകളോ സാക്ഷികളോയില്ല എ.ഡി.എം പണം ആവശ്യപ്പെട്ടിട്ടില്ലെന്നാണ് റിട്ട. അദ്ധ്യാപകനായ ഗംഗാധരനും പറഞ്ഞത്

നവീനിന്റെ കുടുംബം

ദിവ്യയും കളക്ടറും ഗൂഢാലോചന നടത്തി. കളക്ടറുടെ ഫോൺകാൾ രേഖകൾ പരിശോധിക്കണം

ദിവ്യയെ അറസ്റ്റുചെയ്യാതെ പൊലീസ് ഒളിച്ചുകളിച്ചത് സ്വാധീനത്തിന് തെളിവാണ്. എ.ഡി.എമ്മിന്റെ ഭാര്യയുടെ മൊഴി പൊലീസ് രേഖപ്പെടുത്തിയില്ല

രണ്ടുതവണ നോട്ടീസ് നൽകിയിട്ടും ദിവ്യ അന്വേഷണത്തോട് സഹകരിച്ചില്ല
ആത്മഹത്യയിലേക്ക് നയിക്കണം എന്ന ഉദ്ദേശ്യം ദിവ്യയ്ക്കുണ്ടായിരുന്നില്ലെന്ന വാദം തെറ്റാണ്

റവന്യു അന്വേഷണത്തിൽ കളക്ടർ നേരിട്ട് മൊഴി നൽകിയില്ല. നിയമോപദേശം തേടിയശേഷം എഴുതി തയ്യാറാക്കിയ മൊഴിയാണ് നൽകിയത്

സർക്കാർ ജീവനക്കാരൻ പെട്രോൾ പമ്പ് തുടങ്ങണം എന്നു പറഞ്ഞു വരുമ്പോൾ ജില്ലാ പഞ്ചായത്ത് അദ്ധ്യക്ഷയെന്ന നിലയിൽ തടയേണ്ടതല്ലേ

കൈക്കൂലി കൊടുത്തെങ്കിൽ എന്തുകൊണ്ട് പ്രശാന്തനെതിരെ നടപടിയെടുത്തില്ല

കാൾ ഹിസ്റ്ററി

കോടതിയിൽ

ടി.വി.പ്രശാന്തനും നവീൻബാബുവും തമ്മിലുള്ള ഫോൺകാളുകളുടെ വിവരം പ്രതിഭാഗം ഹാജരാക്കി. എ.ഡി.എം എന്തിന് പ്രശാന്തനെ വിളിച്ചുവെന്ന് പ്രതിഭാഗം ചോദിച്ചു. അവർ തമ്മിൽ മുൻപരിചയമില്ല, ഇതിന് മുൻപ് നവീൻ പ്രശാന്തനെ ഒരിക്കലും വിളിച്ചിട്ടില്ല.