സബ്സ്റ്റേഷനിൽ തീപിടിത്തം; ഹീത്രോ വിമാനത്താവളം അടച്ചു, ലണ്ടനിൽ കടുത്ത പ്രതിസന്ധി

ലണ്ടൻ: ബ്രിട്ടണിലെ ഹീത്രോ വിമാനത്താവളം താൽക്കാലികമായി അടച്ചെന്ന അറിയിപ്പുമായി അധികൃതർ. വിമാനത്താവളത്തിന് അടുത്തുളള ഇലക്ട്രിക് സബ്സ്‌​റ്റേഷനിൽ തീപിടിത്തമുണ്ടായതിനെ തുടർന്നാണ്. ഇതോടെ നിരവധി വിമാനങ്ങളുടെ സർവീസുകൾ റദ്ദാക്കിയിട്ടുണ്ട്. സുരക്ഷാക്രമീകരണങ്ങളെ തുടർന്ന് 24 മണിക്കൂറെങ്കിലും വിമാനത്താവളം അടച്ചിടുമെന്നാണ് അറിയിപ്പ്. ഇന്നലെ രാത്രി പതിനൊന്നരയോടെയാണ് സബ്സ്‌​റ്റേഷനിൽ തീപിടിത്തമുണ്ടായത്. ഇന്ന് പുലർച്ചെ രണ്ട് മണിയോടെയാണ് വിമാനത്താവളം അടച്ചുപൂട്ടിയത്.

യാത്രക്കാർ ഇനിയൊരു അറിയിപ്പുണ്ടാകുന്നതുവരെ വിമാനത്താവളത്തിൽ എത്തേണ്ടന്നും അസൗകര്യമുണ്ടായതിന് ക്ഷമ ചോദിക്കുന്നതായും അറിയിപ്പിലുണ്ട്. പ്രവർത്തനം എപ്പോൾ ആരംഭിക്കുമെന്ന കാര്യത്തിൽ അധികൃതർ കൂടുതൽ വ്യക്തത വരുത്തിയിട്ടില്ല. ഫ്‌ളൈറ്റ് ട്രാക്കിംഗ് വെബ്‌സൈ​റ്റായ ഫ്‌ളൈ​റ്റ് റഡാറിൽ നിന്ന് ലഭിക്കുന്ന വിവരം അനുസരിച്ച് 120 വിമാനങ്ങൾ വഴിതിരിച്ച് വിടേണ്ടി വന്നിട്ടുണ്ടെന്നാണ് വിവരം. ഏ​റ്റവും വലിയ വിമാനത്താവളങ്ങളിൽ ഒന്നാണ് ഹീത്രോ. ദിവസം രണ്ടര ലക്ഷം ആളുകളാണ് ഇവിടെ എത്തുന്നത്. ലോകത്തെ 180 കേന്ദ്രങ്ങളിലേക്ക് ഇവിടെ നിന്ന് അന്താരാഷ്ട്ര വിമാനങ്ങൾ സർവീസ് നടത്തുന്നുണ്ട്. ദിവസം 1400 സർവീസുകൾ ഹീത്രോയിൽ നടക്കുന്നുണ്ടെന്നാണ് വിവരം.

വിമാനത്താവളത്തിൽ നിന്ന് മൂന്ന് കിലോമീ​റ്റർ അകലത്തിലാണ് തീപിടിച്ച ഇലക്ട്രിക് സ്​റ്റേഷൻ സ്ഥിതി ചെയ്യുന്നത്. മേഖലയിൽ പത്ത് ഫയർ എഞ്ചിനുകളെ വിന്യസിച്ചിട്ടുണ്ട്. ഇതോടെ വെസ്​റ്റ് ലണ്ടനിലെ ആയിരക്കണക്കിന് വീടുകളിലെ വൈദ്യുത ബന്ധം തടസപ്പെട്ടിരിക്കുകയാണ്. ഇത് പ്രാദേശിക വ്യവസായത്തെയും ബാധിക്കുന്നതയാണ് റിപ്പോർട്ടുകൾ. തീപിടിത്തത്തോടെ ലണ്ടനിൽ കടുത്ത പ്രതിസന്ധിയാണ് ഉണ്ടായിരിക്കുന്നത്.