അങ്ങ് ദൂരെ ഗ്രഹത്തിൽ ജീവന്റെ കണം!

ലണ്ടൻ: ഭൂമിയിൽ നിന്ന് 124 പ്രകാശ വർഷം അകലെ ' കെ 2 -18 ബി" എന്ന ഗ്രഹത്തിൽ ജീവ സാന്നിദ്ധ്യത്തിന്റെ ശക്തമായ സൂചന. ഇന്ത്യൻ വംശജനായ ഡോ. നിക്കു മധുസൂദന്റെ നേതൃത്വത്തിൽ കേംബ്രിഡ്ജ് സർവകലാശാല ഗവേഷകരാണ് നിർണായക കണ്ടെത്തലിന് പിന്നിൽ.

ഒരു പ്രകാശ വർഷം 9.46 ട്രില്യൺ (9460730472580.8)​ കിലോമീറ്ററാണ്. അപ്പോൾ ഊഹിക്കാം,​ ഭൂമിയിൽ നിന്ന് കെ 2 -18 ബിയിലേക്കുള്ള അകലം.

നാസയുടെ ജെയിംസ് വെബ് സ്‌പേസ് ടെലിസ്കോപ്പിൽ നിന്ന് ശേഖരിച്ച ഡേറ്റയാണ് പഠനത്തിന് അടിസ്ഥാനമാക്കിയത്. കെ 2-18 ബിയുടെ അന്തരീക്ഷത്തിൽ മീഥേൻ, കാർബൺ ഡൈഓക്സൈഡ് തുടങ്ങിയ കാർബൺ സമ്പുഷ്ട തന്മാത്രകളുടെ സാന്നിദ്ധ്യം ഗവേഷകർ കണ്ടെത്തി.

ഡൈമീഥൈൽ സൾഫൈഡിന്റെ (ഡി.എം.എസ്) അംശവും ഗ്രഹത്തിലുണ്ടാകാമെന്ന് സംശയിക്കുന്നു. മറൈൻ ആൽഗേ പോലുള്ള ജീവജാലങ്ങൾ മാത്രം ഉത്പാദിപ്പിക്കുന്ന ഒന്നാണിത്.

ഭൂമിക്ക് പുറത്ത് ജീവനുണ്ടാകാമെന്നതിന്റെ ഏ​റ്റവും ശക്തമായ തെളിവാണിതെന്നും ഒന്നു രണ്ട് വർഷത്തിനുള്ളിൽ സ്ഥിരീകരിക്കാനാകുമെന്നും ഡോ. നിക്കു മധുസൂദൻ മാദ്ധ്യമത്തോട് പറഞ്ഞു. അതേ സമയം, കണ്ടെത്തലുകൾ സ്ഥിരീകരിച്ചിട്ടില്ലെന്നും കൂടുതൽ ഡേറ്റകൾ ആവശ്യമാണെന്നും നാസ വ്യക്തമാക്കി.

ഭൂമിയേക്കാൾ 2.6 ഇരട്ടി വലുത്

 കെ 2-18 എന്ന ചുവന്ന കുള്ളൻ നക്ഷത്രത്തെ ഭ്രമണം ചെയ്യുന്ന കെ 2-18 ബി ഭൂമിയേക്കാൾ 2.6 ഇരട്ടി വലുത്

 2015ൽ കെപ്ലർ സ്‌പേസ് ടെലിസ്കോപ്പാണ് കെ 2-18 ബിയെ ആദ്യമായി കണ്ടെത്തിയത്

 2019ൽ കെ 2-18 ബിയിൽ ജലബാഷ്പത്തിന്റെ സാന്നിദ്ധ്യവും റിപ്പോർട്ട് ചെയ്യപ്പെട്ടിരുന്നു