ലോകരാജ്യങ്ങൾക്ക് വേണം ഇന്ത്യയുടെ സൂപ്പർ സോണിക് ബ്രഹ്മോസ് മിസൈൽ

ന്യൂഡൽഹി: പാകിസ്ഥാനെ തലങ്ങും വിലങ്ങും പ്രഹരിച്ച ഇന്ത്യയുടെ അഭിമാന സൂപ്പർ സോണിക് ക്രൂയിസ് മിസൈലായ ബ്രഹ്മോസ് ലോകരാജ്യങ്ങളിൽ സൂപ്പർ ഹിറ്റ്. ഇന്ത്യൻ അതിർത്തിക്കകത്ത് നിന്നു കൊണ്ടു തന്നെ പാകിസ്ഥാനെ പാഠം പഠിപ്പിച്ച രാജ്യത്തിന്റെ കരുത്താണ് ബ്രഹ്മോസ്. തെക്കുകിഴക്കൻ ഏഷ്യൻ രാജ്യങ്ങളായ തായ്ലൻഡ്, സിംഗപ്പൂർ,​ ബ്രൂണെ, ലാറ്റിൻ അമേരിക്കൻ രാജ്യങ്ങളായ ബ്രസീൽ,​ ചിലി, അർജന്റീന, വെനസ്വേല, മദ്ധ്യകിഴക്കൻ രാജ്യങ്ങളായ ഈജിപ്‌ത്, സൗദി അറേബ്യ,​ യു.എ.ഇ,​ ഖത്തർ,​ ഒമാൻ എന്നിവയ്‌ക്ക് പുറമെ വിയറ്റ്നാം,​ മലേഷ്യ, സൗത്ത് ആഫ്രിക്ക,​ ബർഗേറിയ തുടങ്ങിയ രാജ്യങ്ങൾ ബ്രഹ്മോസ് വാങ്ങാൻ താത്പര്യം അറിയിച്ചു.

ചൈനയെ ചെറുക്കാൻ

വിയറ്റ്നാമിന് വേണം

വിയറ്റ്നാമുമായി 700 മില്യൺ യു.എസ് ഡോളറിന്റെ ഇടപാട് അന്തിമഘട്ടത്തിലാണ്. ചൈനയ്‌ക്കെതിരെ സമുദ്ര പ്രതിരോധത്തിന്റെ ശേഷി കൂട്ടാനാണ് വിയറ്റ്നാം വാങ്ങുന്നത്. സുഖോയ് ഫൈറ്റർ ജെറ്റുകളിൽ ഘടിപ്പിക്കാനും, കേദ- ക്ലാസ് യുദ്ധകപ്പലുകളിൽ വിന്യസിക്കാനുമാണ് മലേഷ്യയ്‌ക്ക് വേണ്ടത്. കഴിഞ്ഞ ഏപ്രിലിൽ ഫിലിപ്പൻസിന് മിസൈലുകൾ കൈമാറിയിരുന്നു. 2022ൽ 375 മില്യൺ യു.എസ് ഡോളറിന്റെ കരാറാണ് ഒപ്പിട്ടിരുന്നത്.

നിർമ്മാണ ചെലവ്

4.75 മില്യൺ ഡോളർ

 ഒരു ബ്രഹ്മോസിന് 4.75 മില്യൺ യു.എസ് ഡോളറാണ് നിർമ്മാണ ചെലവ്

 യൂണിവേഴ്സൽ ലോംഗ് റേഞ്ച് സൂപ്പർ സോണിക് ക്രൂയിസ് മിസൈൽ സംവിധാനം

 കരയിലും കടലിലും ആകാശത്തും നിന്ന് പ്രഹരിക്കാൻ മൂന്നു മാേഡലുകൾ

 ഖര പ്രൊപ്പല്ലന്റ് ബൂസ്‌റ്റർ എൻജിൻ. ആദ്യ ഘട്ടത്തിൽ എൻജിൻ മിസൈലിനെ സൂപ്പർ സോണിക് വേഗത്തിലേക്ക് കൊണ്ടുപോകും. രണ്ടാംഘട്ടത്തിൽ മിസൈൽ വേർപെട്ട് ലക്ഷ്യസ്ഥാനത്ത് പ്രഹരിക്കും.

 ഇന്ത്യയ്ക്കായി ഡി.ആർ.ഡി.ഒയും റഷ്യയുടെ എൻ.പി.ഒ.എമ്മും ഇവിടെ വികസിപ്പിച്ചത്