യാത്രക്കാരുടെ ശ്രദ്ധയ്‌ക്ക്; റെയിൽവേ ട്രാക്കിൽ മരം വീണു, വിവിധ റൂട്ടുകളിലേക്കുള്ള ട്രെയിൻ പിടിച്ചിട്ടിരിക്കുന്നു

ആലപ്പുഴ: കനത്ത മഴയിൽ മരം വീണതിനെത്തുടർന്ന് ആലപ്പുഴ - എറണാകുളം റൂട്ടിലെ ട്രെയിൻ ഗതാഗതം തടസപ്പെട്ടു. അരൂർ കെൽട്രോണിന് സമീപം റെയിൽവേ ട്രാക്കിലേക്കാണ് മരം വീണത്. മരം മുറിച്ചുമാറ്റാനുള്ള ശ്രമങ്ങൾ ആരംഭിക്കാൻ പോകുന്നുവെന്നാണ് വിവരം. ഈ റൂട്ട് വഴി പോകേണ്ട ട്രെയിനുകളെല്ലാം വിവിധ സ്റ്റേഷനുകളിൽ പിടിച്ചിട്ടിരിക്കുകയാണ്.

ഇന്ന് വൈകിട്ട് അഞ്ച് മണിയോടെയാണ് ഈ റൂട്ടിലുള്ള ട്രെയിൻ ഗതാഗതം തടസപ്പെട്ടത്. ആലപ്പുഴ - ചെന്നൈ എക്‌സ്‌പ്രസ്, എഴുപുന്ന സ്റ്റേഷനിൽ പിടിച്ചിട്ടിരിക്കുകയാണ്. ആലപ്പുഴ - കണ്ണൂർ എക്‌‌സ്‌പ്രസ് തുറവൂർ സ്റ്റേഷനിൽ പിടിച്ചിട്ടു. ആലപ്പുഴ വഴിയുള്ള ട്രെയിനുകളെല്ലാം എറണാകുളം സൗത്ത് സ്റ്റേഷനിലും പിടിച്ചിട്ടിട്ടുണ്ട്. ട്രാക്കിൽ നിന്നും മരം പൂർണമായും മാറ്രിയ ശേഷം മാത്രമേ ട്രെയിൻ ഗതാഗതം പുനഃസ്ഥാപിക്കുകയുള്ളു. അതിനാൽ, ഇനിയും മണിക്കൂറുകളെടുക്കുമെന്നാണ് വിവരം.