വിപഞ്ചികയുടെയും കുഞ്ഞിന്റെയും മൃതദേഹങ്ങൾ നാട്ടിലെത്തിക്കണം; അമ്മ ഷാർജയിലെത്തി, നിധീഷിനെതിരെ പരാതി നൽകും

ഷാർജ: അൽ ന​ഹ്​ദ​യി​ലെ ഫ്ലാറ്റിൽ തൂങ്ങിമരിച്ച നിലയിൽ കണ്ടെത്തിയ കൊല്ലം സ്വദേശിനി വിപഞ്ചികയുടെ മാതാവ് ഷൈലജ ഷാർജയിൽ എത്തി. ബന്ധുവിനൊപ്പം ഇന്ന് പുലർച്ചെയാണ് ഷാർജയിൽ എത്തിയത്. മകളുടെയും കുട്ടിയുടെയും മൃതദേഹം നാട്ടിലേക്ക് കൊണ്ടുപോകണമെന്ന് അധികൃതരോട് ആവശ്യപ്പെടും. വിപഞ്ചികയുടെ സഹോദരൻ വിനോദും കാനഡയിൽ നിന്ന് ഇന്ന് രാത്രിയോടെ ഷാർജയിൽ എത്തും. വിപഞ്ചികയുടെ ഭർത്താവ് നിധീഷിനെതിരെ ഷാർജയിൽ പരാതി നൽകാനും വിപഞ്ചികയുടെ കുടുംബം ആലോചിക്കുന്നുണ്ട്. ഇന്ത്യൻ കോൺസുലേറ്റ് അധികൃതരുമായും ബന്ധുക്കൾ സംസാരിക്കും.

അതേസമയം, നിധീഷിന്റെയും ബന്ധുക്കളുടെയും പേരിൽ കുണ്ടറ പൊലീസ് കേസെടുത്തിട്ടുണ്ട്. വി​പ​ഞ്ചി​ക​യു​ടെ അ​മ്മ ഷൈ​ല​ജ​യു​ടെ പ​രാ​തി​യിൽ ആ​ത്മ​ഹ​ത്യാ പ്രേ​ര​ണ, സ്​ത്രീ​ധ​ന പീ​ഡ​നം തു​ട​ങ്ങി​യ വ​കു​പ്പു​കളാണ് ചുമത്തിയിരിക്കുന്നത്. ഭർത്താവ് നിധീഷ്, ഭർതൃസഹോദരി നീതു, നിധീഷിന്റെ അച്ഛൻ മോഹനൻ എന്നിവരെ ഒന്നുമുതൽ മൂന്നുവരെ പ്രതികളാക്കിയാണ് കേസ്. ഷൈലജയുടെ മൊഴി രേഖപ്പെടുത്തിയാണ് പൊലീസ് എഫ്‌ഐആർ രജിസ്റ്റർ ചെയ്‌തത്.

കഴിഞ്ഞ ചൊവ്വാഴ്‌ചയാണ് വിപഞ്ചികയും(33) മകൾ വൈഭവിയും ഇവർ താമസിച്ചിരുന്ന ഷാർജിലെ ഫ്ലാറ്റിൽ തൂങ്ങിമരിച്ച നിലയിൽ കണ്ടെത്തിയത്. ഷാർജയിലെ സ്വകാര്യ കമ്പനിയിൽ എച്ച‌്‌ആർ മാനേജറായിരുന്നു എംബിഎ ബിരുദധാരിയായ വിപഞ്ചിക. 2020 നവംബറിലായിരുന്നു കോട്ടയം സ്വദേശി നിധീഷുമായി വിപഞ്ചികയുടെ വിവാഹം. വിവാഹശേഷം ഷാർജയിൽ തന്നെയുള്ള ഭർത്താവിന്റെയും ബന്ധുക്കളുടെയും ഒപ്പമായിരുന്നു താമസം. ആദ്യദിവസം മുതൽ കടുത്ത പീഡനവും അവഹേളനവും അനുഭവിച്ചതായി വിപഞ്ചിക ആറുപേജുള്ള ആത്മഹത്യാക്കുറിപ്പിൽ പറയുന്നു.

​ഷാർ​ജ​യിൽ ന​ട​ന്ന കു​റ്റ​കൃ​ത്യം ഇ​വി​ടെ അ​ന്വേ​ഷിക്കണമെന്നാണ് വി​പ​ഞ്ചി​ക​യു​ടെ കു​ടും​ബ​ത്തി​ന്റെ ആ​വ​ശ്യം. ഷാർ​ജ​യി​ലെ പ​രി​ശോ​ധ​ന​ക​ളിൽ വി​ശ്വാ​സ​മി​ല്ലെ​ന്നും നാ​ട്ടിലെ​ത്തി​ക്കു​ന്ന മൃത​ദേ​ഹ​ങ്ങൾ വീ​ണ്ടും പോ​സ്റ്റ്‌​മോർ​ട്ടം ന​ട​ത്താൻ ശ്ര​മി​ക്കു​മെ​ന്നും കു​ടും​ബാം​ഗ​ങ്ങൾ വ്യ​ക്ത​മാ​ക്കി. ഭർ​തൃകു​ടും​ബ​ത്തി​നെതിരെ വി​പ​ഞ്ചി​ക ഫേ​സ്​ബു​ക്കിൽ പ​ങ്കു​വ​ച്ച കു​റി​പ്പ് അ​പ്ര​ത്യ​ക്ഷ​മാ​യ​തിൽ ദു​രൂ​ഹ​ത​യു​ണ്ടെ​ന്നും പ​രാ​തി​യു​ണ്ട്. വി​പ​ഞ്ചി​ക ഉ​പ​യോ​ഗി​ച്ചി​രു​ന്ന ഫോ​ണും ലാ​പ്‌​ടോ​പ്പും കാ​ണാ​താ​യ​തും അ​ന്വേ​ഷി​ക്ക​ണ​മെ​ന്ന് കു​ടും​ബം ആ​വ​ശ്യ​പ്പെ​ടു​ന്നുണ്ട്.