നിങ്ങളുടെ വാട്‌സാപ്പിൽ ഏതുനിമിഷവും ഒരു മെസേജ് എത്തിയേക്കാം; തുറക്കരുത്, മുന്നറിയിപ്പുമായി കേരള പൊലീസ്

തിരുവനന്തപുരം: വാട്‌സാപ്പിലൂടെ മോട്ടോർ വാഹന വകുപ്പിന്റെ പേരിൽ .apk ഫയലുകൾ ലഭിച്ചാൽ തുറന്ന് നോക്കരുതെന്ന മുന്നറിയിപ്പുമായി കേരള പൊലീസ്. .apk ഫയലുകൾ അയച്ച് പണം തട്ടുന്ന സംഘം സജീവമാണെന്നും ജാഗ്രത പാലിക്കണമെന്നും കേരള പൊലീസിന്റെ ഒഫീഷ്യൽ ഫേസ്‌ബുക്ക് പേജിലുള്ള പോസ്റ്റിൽ പറയുന്നു.

മോട്ടോർ വാഹന വകുപ്പിന്റെ പേരിൽ ട്രാഫിക് ചെല്ലാൻ .apk ഫയലുകളായി അയച്ചാണ് തട്ടിപ്പ് നടത്തുന്നത്. ഇതിന്റെ സ്‌ക്രീൻ ഷോട്ടും കുറിപ്പിനൊപ്പം നൽകിയിട്ടുണ്ട്. മോട്ടോർ വാഹന വകുപ്പിന്റെ പേരിലോ നിങ്ങളുടെ സുഹൃത്തുക്കളുടെ അക്കൗണ്ടിൽ നിന്നോ ഇത്തരം ഫയലുകൾ വന്നേക്കാം. അത് ഡൗൺലോഡ് ചെയ്യരുത്. ഇത്തരം ആപ്ലിക്കേഷൻ ഫയലുകൾ ഇൻസ്റ്റാൾ ആയാൽ നിങ്ങളുടെ ഫോണിന്റെ നിയന്ത്രണം തട്ടിപ്പുകാർ കയ്യടക്കുമെന്നും പൊലീസ് അറിയിച്ചു.

ഇതിലൂടെ നിങ്ങളുടെ ഫോണിലുള്ള ബാങ്കിംഗ് ആപ്ലിക്കേഷനുകളിലൂടെ പണം തട്ടിയെടുക്കാനും സോഷ്യൽ മീഡിയ അക്കൗണ്ടുകൾ വഴി ഈ ആപ്ലിക്കേഷൻ ഫയലുകൾ നിങ്ങളുടെ സുഹൃത്തുക്കൾക്ക് അയച്ചുകൊടുക്കുകയും ചെയ്യും. അതിനാൽ, ഇത്തരം സന്ദേശങ്ങൾ വന്നുകഴിഞ്ഞാൽ ജാഗ്രത പാലിക്കണം. ഇത്തരം മെസേജുകൾ വരികയോ സാമ്പത്തിക തട്ടിപ്പിന് ഇരയാവുകയോ ചെയ്‌താൽ 1930 എന്ന നമ്പറിൽ ബന്ധപ്പെടണമെന്നും കേരള പൊലീസ് അറിയിച്ചു. cybercrime.gov.in എന്ന വെബ്‌സൈറ്റ് വഴിയോ പൊലീസിനെ വിവരം അറിയിക്കാം.