അടൂരിൽ ശ്രീകൃഷ്ണ ജയന്തി: വിവിധയിടങ്ങളിൽ ശോഭയാത്രകൾ

അടൂർ: ശ്രീകൃഷ്ണ ജയന്തി ആഘോഷങ്ങൾക്ക് അടൂരിൽ ഒരുക്കങ്ങളായി. ഇന്ന് ഉച്ചയ്ക്ക് ശേഷം ശോഭയാത്രകൾക്ക് തുടക്കമാകും. ബാലഗോകുലം അടൂർ നഗർ മണ്ഡലത്തിന്റെ നേതൃത്വത്തിൽ വൈകിട്ട് 4.30ന് അടൂർ സ്വകാര്യ ബസ്സ്റ്റാൻഡിൽ ശോഭയാത്ര തുടങ്ങും. അടൂർ ടൗൺ, മൂന്നാളം, പന്നിവിഴ എന്നിവിടങ്ങളിൽ നിന്നുള്ള ഉപശോഭയാത്രകൾ ചേർന്നാണ് അടൂരിലെ ശോഭയാത്ര ആരംഭിക്കുന്നത്. പാർത്ഥസാരഥി ക്ഷേത്രത്തിൽ സമാപിക്കും. തുടർന്ന് ഉറിയടി. രാത്രി 12ന് ക്ഷേത്രത്തിൽ അവതാരദർശനം. 12.30ന് ശ്രീഭൂതബലി എഴുന്നെള്ളത്ത്. ബാലഗോകുലം പെരിങ്ങനാട് മണ്ഡലത്തിന്റെ ശോഭയാത്രകൾക്ക് വൈകിട്ട് മൂന്നിന് തുടങ്ങും. പെരിങ്ങനാട്, മേലൂട്, മിത്രപുരം , ചേന്നംപള്ളിൽ, മലമേക്കര, ചാല, കുന്നത്തൂക്കര എന്നിവിടങ്ങളിൽ നിന്ന് ആരംഭിക്കുന്ന ഉപശോഭയാത്രകൾ ചേന്നംപള്ളിൽ ക്ഷേത്ര മൈതാനിയിൽ സംഗമിക്കും. അവിടെ നിന്ന് തൃച്ചേന്ദമംഗലം ക്ഷേത്രത്തിലേക്ക് മഹാശോഭയാത്രയായി പുറപ്പെടും. ചൂരക്കോട് ശ്രീനാരായണ ക്ഷേത്രത്തിലെ അഷ്ടമിരോഹിണി ഉത്സവത്തിന്റെ ഭാഗമായി രാവിലെ ഏഴിന് വിഷ്ണുനാമ സമർപ്പണം. ശ്രീനാരായണ ബാലഗോകുലത്തിന്റെ ശോഭയാത്ര വൈകിട്ട് 3.30ന് ആരംഭിക്കും. ക്ഷേത്രത്തിൽ നിന്നും ആരംഭിക്കുന്ന ശോഭയാത്ര ഇലങ്കത്തിൽ ക്ഷേത്രം വഴി കുറ്റിയിൽ ദേവീക്ഷേത്രത്തിൽ എത്തിച്ചേരും. ഇവിടെ നിന്ന് മഹാശോഭയാത്രയായി ചൂരക്കോട് സുബ്രഹ്മണ്യസ്വാമി ക്ഷേത്രം വഴി മഹാവിഷ്ണു ക്ഷേത്രത്തിൽ സമാപിക്കും. രാത്രി10ന് കലശം, 11.30ന് എഴുന്നെള്ളത്ത്. ബാലഗോകുലം ഏഴംകുളം - അനന്തരാമപുരം മണ്ഡലങ്ങളുടെ വിവിധ പ്രദേശങ്ങളായ ഏഴംകുളം, അയോദ്ധ്യ നഗർ, നെടിയത്ത് പടി, ഉടയാൻമുറ്റം,പുതുമല, നെടുമൺ,മാംങ്കൂട്ടം- കുന്നിന്മേൽ,അറുകാലിക്കൽ , പറക്കോട്, കോട്ടമുകൾ, ടി ബി ജംഗ് ഷൻ,മുല്ലൂർ കുളങ്ങര, ചിരണിക്കൽ, മാണിക്യമല എന്നിവിടങ്ങളിൽ നിന്നുള്ള ഉപശോഭയാത്രകൾ വൈകിട്ട് 3 ന് പറക്കോട് ഇണ്ടളിയപ്പൻ ക്ഷേത്രത്തിൽ സംഗമിച്ച് വൈകിട്ട് 4ന് മഹാശോഭയാത്രയായി ഏഴംകുളം ജംഗ്ഷൻ വഴി ഏഴംകുളം ദേവീക്ഷേത്രത്തിൽ സമാപിക്കുന്നു.ശേഷം കൃഷ്ണ വേഷധാരികൾ അണി നിരക്കുന്ന ഉറിയടിയും ഒപ്പം അവൽ പ്രസാദ വിതരണവും ക്ഷേത്ര സന്നിധിയിൽ നടക്കും. വൈകിട്ട് 4ന് പറക്കോട് ഇണ്ടിളയപ്പൻ ക്ഷേത്രാങ്കണത്തിൽ നിന്നും ആരംഭിക്കുന്ന മഹാശോഭയാത്രയുടെ ഗോകുലധ്വജാരോഹണം ഏഴംകുളം ദേവിക്ഷേത്ര മേൽ ശാന്തി രഞ്ജിത്ത് നാരായണ ഭട്ടതിരിപ്പാടും ശ്രീകൃഷ്ണ വിഗ്രഹത്തിന് ഹാരാർപ്പണം പറക്കോട് ഇണ്ടിളയപ്പൻ ക്ഷേത്ര മേൽശാന്തി രഞ്ജിത് ശർമ്മയും നിർവഹിക്കും. ആലുംമൂട് ശ്രീമഹാദേവ ബാലഗോകുലത്തിന്റെ നേതൃത്വത്തിൽ തെങ്ങമത്തും ആദിപരാശക്തി ബാലഗോകുലത്തിന്റെ നേതൃത്വത്തിൽ തുവയൂർ തെക്കും ശ്രീദുർഗാ ഹൈന്ദവ സേവാസമിതിയുടെ നേതൃത്വത്തിൽ വടക്കടത്തുകാവിലും ശ്രീകൃഷ്‌ണ ജയന്തി ശോഭായാത്രയും മറ്റു ആഘോഷപരിപാടികളും നടക്കും.