നായാട്ടിനിടെ അബദ്ധത്തിൽ വെടിയേറ്റെന്ന് സൂചന,​ കണ്ണൂരിൽ റബ്ബർ എസ്റ്റേറ്റിൽ യുവാവിന്റെ മൃതദേഹം

കണ്ണൂർ: പെരിങ്ങോം വെള്ളോറയിൽ യുവാവ് വെടിയേ​റ്റ് മരിച്ചു. ഇടക്കോം സ്വദേശി സിജോയാണ് മരിച്ചത്. വെള്ളോറയിലെ ഒരു റബ്ബർ എസ്​റ്റേ​റ്റിലാണ് യുവാവിന്റെ മൃതദേഹം കണ്ടെത്തിയത്. ഇന്ന് പുലർച്ചെ അഞ്ച് മണിയോടെയായിരുന്നു സംഭവം. നായാട്ടിനിടെ അബദ്ധത്തിൽ വെടികൊണ്ടതാകാമെന്നാണ് പ്രാഥമിക വിവരം. സിജോയുടെ സുഹൃത്ത് ഷൈനിനെ പൊലീസ് കസ്​റ്റഡിയിലെടുത്തിട്ടുണ്ട്.

യുവാക്കളുടെ കൈവശം നാടൻ തോക്കുകളുണ്ടായിരുന്നു. കാട്ടുപന്നിയെ പിടിക്കാനിറങ്ങിയപ്പോഴായിരുന്നു സംഭവമെന്നാണ് ഷൈൻ പൊലീസിന് മൊഴി നൽകിയത്. സംഭവത്തിൽ പെരിങ്ങോം പൊലീസ് അന്വേഷണം ആരംഭിച്ചിട്ടുണ്ട്. പയ്യന്നൂർ ഡിവൈഎസ്പിയടങ്ങുന്ന സംഘം സംഭവസ്ഥലത്തെത്തിയിട്ടുണ്ട്. മൃതദേഹം അടുത്തുളള ആശുപത്രിയിലേക്ക് മാ​റ്റും. ഈ മേഖലയിൽ സാധാരണയായി കാട്ടുപന്നികൾ ഇറങ്ങാറുണ്ടെന്നാണ് നാട്ടുകാർ പറയുന്നത്. മരണത്തിനുപിന്നിൽ എന്തെങ്കിലും ദുരൂഹതയുണ്ടോയെന്ന കാര്യവും അന്വേഷിക്കും.