രക്തദാന ക്യാമ്പ് സംഘടിപ്പിച്ചു

കോഴിക്കോട്: ചേളന്നൂർ എസ്.എൻ ട്രസ്റ്റ് ഹയർ സെക്കൻഡറി സ്കൂൾ എൻ.എസ്.എസ് യൂണിറ്റുകളും കോഴിക്കോട് ഇഖ്റ ഹോസ്പിറ്റലും സംയുക്തമായി മെഗാ രക്തദാന ക്യാമ്പ് സംഘടിപ്പിച്ചു. രക്തദാനം മഹാദാനം എന്ന സന്ദേശം കുട്ടികളിലും പൊതുസമൂഹത്തിലും എത്തിക്കുക എന്ന ലക്ഷ്യത്തോടെയാണ് ക്യാമ്പ് സംഘടിപ്പിച്ചത്. പൂർവ വിദ്യാർത്ഥികൾ, രക്ഷിതാക്കൾ, നാട്ടുകാർ എന്നിവർ ക്യാമ്പിന്റെ ഭാഗമായി. സ്കൂൾ പ്രിൻസിപ്പൽ പി.കെ ഷീജ ഉദ്ഘാടനം ചെയ്തു. പ്രധാനദ്ധ്യാപിക പി. ജൂലി, എൻ.എസ്.എസ് പ്രോഗ്രാം ഓഫീസർമാരായ എ.കെ പ്രവീഷ്, പി. സനിൽകുമാർ, പി.ടി.എ പ്രസിഡന്റ് ജ്യോതിഷ്, പി.വി പ്രീതി, എൻ.എസ്.എസ് വളണ്ടിയർമാർ എന്നിവർ ക്യാമ്പിന് നേതൃത്വം നൽകി.