കുങ്കിയാന മടങ്ങി: കാട്ടാനയിറങ്ങി

തൃശൂർ: കഴിഞ്ഞ 21 ദിവസമായി കാട്ടാന ഇറങ്ങുന്നതും കാത്തുനിന്ന രണ്ട് കുങ്കിയാനകളെ കഴിഞ്ഞ ദിവസം കൊണ്ടുപോയതിന് പിന്നാലെ വീണ്ടും കാട്ടാനയിറങ്ങി. കുങ്കിയാനകളെ മടക്കികൊണ്ടുപോയി മണിക്കൂറുകൾക്കകമാണ് കാട്ടാന കുതിരാന് സമീപം ഇരുമ്പുപാലത്ത് ഫോറസ്റ്റ് ഓഫീസ് പരിസരത്തേക്ക് ഇറങ്ങിയത്. വയനാട്ടിൽ നിന്നാണ് കുങ്കിയാനകളെ ഇവിടെ എത്തിച്ചത്. ഈ ദിവസങ്ങളിലൊന്നും കാട്ടാന ഇറങ്ങാതായതോടെയാണ് മറ്റു സ്ഥലത്തേയ്ക്ക് പോയിട്ടുണ്ടാകുമെന്ന തീരുമാനത്തിൽ കുങ്കിയാനകളെ തിരികെ കൊണ്ടു പോയത്. എന്നാൽ കാട്ടാനയുടെ സാന്നിദ്ധ്യം മനസിലാക്കാൻ വേണ്ട സംവിധാനമില്ലാത്തതിനാലാണ് പരിസരത്ത് ഉണ്ടായിരുന്ന കാട്ടാനയെ കണ്ടെത്താൻ കഴിയാത്തതെന്ന് നാട്ടുകാർ ആരോപിച്ചു. നാട്ടിലിറങ്ങിയ കാട്ടാന ഫോറസ്റ്റ് വാച്ചറെയും ഫോറസ്റ്റ് ജീപ്പും തകർത്തിരുന്നു. തുടർന്നാണ് മന്ത്രി എ.കെ. ശശീന്ദ്രൻ കുങ്കിയാനകളെ കൊണ്ടുവരാൻ നിർദ്ദേശിച്ചത്.