വിദേശത്തേക്ക് പറക്കാൻ കൊതിച്ച് പകുതിയിലേറെ ഇന്ത്യക്കാർ

മുംബയ്: എ.ഐ അധിഷ്ഠിത ഗ്ലോബൽ ടാലന്റ് മൊബിലിറ്റി പ്ലാറ്റ്‌ഫോമായ ടേൺ ഗ്രൂപ്പ് നടത്തിയ സർവേയിൽ ഇന്ത്യയിൽ നിന്ന് വലിയൊരു വിഭാഗം ജനങ്ങൾ വിദേശത്തേക്ക് കുടിയേറാൻ തയ്യാറെടുക്കുന്നതായി കണ്ടെത്തി. ഇന്ത്യയിലുടനീളമുള്ള 8,000 ആളുകൾക്കിടയിൽ നടത്തിയ 'ഇയർഎൻഡർ മൈഗ്രേഷൻ ബാരോമീറ്റർ' സർവേ പ്രകാരമാണ് ഈ കണ്ടെത്തൽ.
സർവേ പ്രകാരം സാമ്പത്തികവും തൊഴിൽപരവുമായ നേട്ടങ്ങൾ ലക്ഷ്യമിട്ട് 52ശതമാനം ഇന്ത്യക്കാരും വിദേശത്തേക്ക് പോകാൻ തയ്യാറെടുക്കുകയോ സാദ്ധ്യതകൾ തേടുന്നവരോ ആണ്. സാമ്പത്തിക വളർച്ചയാണ് കുടിയേറ്റത്തിനുള്ള പ്രധാന കാരണമായി 46 ശതമാനം പേർ ചൂണ്ടിക്കാണിക്കുന്നത്. തൊഴിൽപരമായ വളർച്ച (34%), വ്യക്തിപരമായ സ്വപ്നങ്ങൾ (9%), ആഗോള എക്‌സ്‌പോഷർ (4%) എന്നിവയാണ് മറ്റ് കാരണങ്ങൾ.
യൂറോപ്പും ഏഷ്യയുമാണ് പ്രധാന ലക്ഷ്യസ്ഥാനങ്ങൾ. 43% പേർ ജർമ്മനിയെയാണ് ഏറ്റവും മികച്ച ലക്ഷ്യസ്ഥാനമായി കാണുന്നത്. യു.കെ (17%), ജപ്പാൻ (9%), യു.എസ്.എ (4%) എന്നിവയാണ് തൊഴിലന്വേഷകരുടെ മറ്റ് രാജ്യങ്ങൾ.