ആറങ്ങോട്ട് ശിവക്ഷേത്രത്തിൽ കളംപാട്ട് കുറയിട്ടു

പെരിന്തൽമണ്ണ: മക്കരപ്പറമ്പ് ആറങ്ങോട്ട് ശിവക്ഷേത്രത്തിൽ 26 ദിവസം നീണ്ടുനിൽക്കുന്ന കളംപാട്ടിന് തുടക്കമായി. ക്ഷേത്രം മേൽശാന്തി പുല്ലാനിക്കാട് ശങ്കരനാരായണൻ നമ്പൂതിരി പൂജ ചെയ്ത് നൽകിയ കൂറ വള്ളുവനാട് രാജവംശ പ്രതിനിധകൾ, ക്ഷേത്രം സെക്രട്ടറി, പ്രസിഡന്റ്,​ മറ്റ് ക്ഷേത്ര ഭരണാധികാരികൾ, ഭക്തജനങ്ങൾ എന്നിവരുടെ അനുവാദത്തോടെ കളംപാട്ട് അടിയന്തര ചുമതല നിർവഹിക്കുന്ന കടന്നമണ്ണ ശ്രീനിവാസൻ പാട്ടരങ്ങിൽ ചാർത്തിയാണ് കളംപാട്ടിന് തുടക്കം കുറിച്ചത്. തുടർന്ന് ഉച്ചപാട്ട് നടന്നു. വൈകിട്ട് സന്ധ്യവേലയ്ക്ക് ശേഷം കടന്നമണ്ണ നാരായണൻകുട്ടി കുറുപ്പ് കോഴിക്കോട് ബിജു മാരാർ എന്നിവർ നേതൃത്വം നൽകിയ തിരുമാന്ധാംകുന്നിലമ്മയ്ക്കുള്ള ആദ്യത്തെ കളം പാട്ടും നടന്നു.