ജോസ് ആലുക്കാസിന്റെ പോഡ്കാസ്റ്റ് പരമ്പര 'സെക്കൻഡ് സൺറൈസസ്'ന് തുടക്കം

ചെന്നൈ: ജ്വല്ലറി ബ്രാൻഡായ ജോസ് ആലുക്കാസ് സ്ത്രീകളുടെ ജീവിതത്തിലെ പുതിയ തുടക്കങ്ങളെയും അതിജീവനത്തെയും ആസ്പദമാക്കി 'സെക്കൻഡ് സൺറൈസസ്' എന്ന പേരിൽ പോഡ്കാസ്റ്റ് പരമ്പര ആരംഭിച്ചു. ചലച്ചിത്ര പ്രതിഭ സുഹാസിനി മണിരത്‌നം അവതാരകയാകുന്ന ഈ ആറ് എപ്പിസോഡ് പരമ്പര, പുനർവിവാഹത്തിലൂടെയോ പുതിയ കൂട്ടുകെട്ടുകളിലൂടെയോ ജീവിതം തിരിച്ചുപിടിച്ച സ്ത്രീകളുടെ ധീരമായ കഥകളാണ് പങ്കുവെക്കുന്നത്.

ഇന്ത്യൻ സാമൂഹിക പശ്ചാത്തലത്തിൽ സ്ത്രീകൾ പലപ്പോഴും തുറന്നുസംസാരിക്കാൻ മടിക്കുന്ന പുനർവിവാഹം തുടങ്ങിയ വിഷയങ്ങളെ അന്തസ്സോടെയും ആത്മവിശ്വാസത്തോടെയും പൊതുസമൂഹത്തിന് മുന്നിലെത്തിക്കുകയാണ് ഈ സംരംഭം.

നടിയും ഗായികയുമായ മംമ്ത മോഹൻദാസാണ് പരമ്പരയിലെ ആദ്യ അതിഥി. പൂജ ബേദി, എഴുത്തുകാരി സുധ മേനോൻ, രമ്യ സുബ്രഹ്മണ്യൻ, ബാഡ്മിന്റൺ താരം ജ്വാല ഗുട്ട, പവിത്ര ലോകേഷ്, വിജയ് കൃഷ്ണ നരേഷ് എന്നിവരുടെ അനുഭവങ്ങളും വരും എപ്പിസോഡുകളിൽ ഉൾപ്പെടുത്തിയിട്ടുണ്ട്. ഈ ആഴ്ച മുതൽ യൂട്യൂബ് ഉൾപ്പെടെയുള്ള പ്രമുഖ ഓഡിയോ പ്ലാറ്റ്‌ഫോമുകളിൽ 'സെക്കൻഡ് സൺറൈസസ്' ലഭ്യമാകും.