ഷാഫി പറമ്പിലിനെതിരെ മത്സരിക്കാനൊരുങ്ങി കോൺഗ്രസ് നേതാവ് എ വി ഗോപിനാഥ്; ഞെട്ടൽ മാറാതെ നേതൃത്വം

പാലക്കാട്: പാലക്കാട് കോൺഗ്രസിൽ പൊട്ടിത്തെറി. മുൻ ഡി സി സി അദ്ധ്യക്ഷൻ എ ​വി ​ഗോപിനാഥ് യൂത്ത് കോൺഗ്രസ് സംസ്ഥാന പ്രസിഡന്റ് ഷാഫി പറമ്പിലിനെതിരെ മത്സരിക്കാൻ ഒരുങ്ങുന്നതാണ് നേതൃത്വത്തെ ഞെട്ടിപ്പിച്ചിരിക്കുന്നത്. അദ്ദേഹത്തെ സിപിഎം പിന്തുണയ്‌ക്കുമോയെന്ന കാര്യം ഇന്ന് അറിയാം. മരിക്കുന്നത് വരെ കോൺ​ഗ്രസ് ആകുമെന്ന് പ്രവചിക്കാനാവില്ലെന്നാണ് ഗോപിനാഥിന്റെ പ്രതികരണം.

പാലക്കാട് ജില്ലയിലെ മുതിർന്ന കോൺഗ്രസ് നേതാവാണ് എ വി ഗോപിനാഥ്. 25 വർഷം പെരിങ്ങോട്ടുകുറിശി ​ഗ്രാമപഞ്ചായത്ത് പ്രസിഡന്റായിരുന്ന അദ്ദേഹം ആലത്തൂരിൽ നിന്ന് എം എൽ എ ആയിട്ടുമുണ്ട്. ഷാഫി പറമ്പിലിനെതിരെ മത്സരിക്കാൻ തന്നെ സി പി എം സമീപിച്ചു എന്ന പ്രചാരണം നിഷേധിച്ച അദ്ദേഹം നിയമസഭാ തിരഞ്ഞെടുപ്പുമായി ബന്ധപ്പെട്ട് എന്തെങ്കിലും കാര്യത്തിന് തന്നെ പാർട്ടി ഇതുവരെ അന്വേഷിച്ചിട്ടില്ലെന്ന് വ്യക്തമാക്കി.

മരിക്കുന്നതു വരെ കോൺ​ഗ്രസാകണമെന്ന് ആ​ഗ്രഹമുണ്ടായിരുന്നു. ഇനിയത് നടക്കുമെന്ന് തോന്നുന്നില്ല. കോൺ​ഗ്രസിലെ ഒരു വ്യക്തിയോടും തനിക്ക് പ്രതിജ്ഞാബദ്ധതയില്ല. അഞ്ചു കൊല്ലം തന്നെ ആരും അന്വേഷിച്ചില്ല. തന്നെ ഉപേക്ഷിച്ചവരെ തനിക്കും ഉപേക്ഷിക്കേണ്ടി വരും. കമ്മ്യൂണിസ്റ്റ് വിരോധത്തിനൊപ്പം നിന്ന ആളായിരുന്നു താൻ. പക്ഷേ, എന്തു ചെയ്യാൻ കഴിയും എന്നും എ വി ​ഗോപിനാഥ് ചോദിച്ചു.