തൃശൂർ : പ്രചാരണം അവസാന ഘട്ടത്തിലേക്ക് നീങ്ങുമ്പോൾ പരമാവധി വോട്ടുകൾ സമാഹരിക്കാനും അട്ടിമറി വിജയത്തിനുമായി എൻ.ഡി.എ കൂടുതൽ നേതാക്കളെയെത്തിക്കുന്നു. ഇന്ന് വടക്കാഞ്ചേരി സ്ഥാനാർത്ഥി അഡ്വ. ടി.എസ് ഉല്ലാസ് ബാബുവിന്റെ തിരഞ്ഞെടുപ്പ് റാലിയുടെ ഭാഗമായി നടക്കുന്ന പൊതുസമ്മേളനത്തിൽ കേന്ദ്രമന്ത്രി പ്രഹ്ളാദ് ജോഷി പങ്കെടുക്കും.
നാളെ മദ്ധ്യപ്രദേശ് മുഖ്യമന്ത്രി ശിവരാജ് സിംഗ് ചൗഹാൻ നാട്ടികയിലും ചേലക്കര മണ്ഡലത്തിലും പങ്കെടുക്കും. വൈകീട്ട് നാലിന് എൻ.ഡി.എ സ്ഥാനാർത്ഥി ലോജനൻ അമ്പാട്ടിന്റെ റോഡ് ഷോയുടെ സമാപനസമ്മേളനം ചേർപ്പ് മഹാത്മാ മൈതാനിയിൽ ഉദ്ഘാടനം ചെയ്യും. ചേലക്കര മണ്ഡലത്തിൽ തിരുവില്വാമലയിലാണ് പ്രസംഗിക്കുക. മൂന്നിന് കുന്നംകുളത്ത് കേന്ദ്ര ധനകാര്യ മന്ത്രി നിർമ്മല സീതാരാമനും പങ്കെടുക്കും.
പോളിംഗ് ഡ്യൂട്ടിയുള്ള ഉദ്യോഗസ്ഥർക്ക്
ഇന്ന് മുതൽ വോട്ട് ചെയ്യാം
തൃശൂർ: പോളിംഗ് ഡ്യൂട്ടിക്കായി നിയമിച്ച ഉദ്യോഗസ്ഥർക്കുള്ള പോസ്റ്റൽ വോട്ടുകൾ രേഖപ്പെടുത്തുന്നതിന് ഏപ്രിൽ ഒന്ന്, രണ്ട്, മൂന്ന് തീയതികളിൽ ജില്ലയിലെ നിയമസഭാ നിയോജക മണ്ഡലങ്ങളിലെ അസി. റിട്ടേണിംഗ് ഓഫീസർമാരുടെ (ബി.ഡി.ഒ മാർ) ഓഫീസുകളിലും തൃശൂർ മണ്ഡലത്തിൽ ജില്ലാ സിവിൽ സ്റ്റേഷനിലെ പതിമൂന്നാം നമ്പർ മുറിയിലും രാവിലെ 9 മുതൽ വൈകീട്ട് 5 വരെ സൗകര്യമുണ്ടാകുമെന്ന് ജില്ലാ ഇലക്ഷൻ ഓഫീസർ കൂടിയായ കളക്ടർ അറിയിച്ചു.
പോളിംഗ് ഡ്യൂട്ടിയുള്ള ഉദ്യോഗസ്ഥർക്ക് തപാൽ വോട്ട് രേഖപ്പെടുത്താനുള്ള സജ്ജീകരണമാണ് ഈ വോട്ടർ ഫെസിലിറ്റേഷൻ സെന്ററിൽ ഒരുക്കിയിട്ടുള്ളത്. പോളിംഗ് ഡ്യൂട്ടി ലഭിച്ച ഉദ്യോഗസ്ഥർ ഫോറം 12 ൽ അവരവർക്ക് വോട്ടവകാശമുള്ള നിയോജക മണ്ഡലത്തിലെ വണാധികാരിക്ക് തപാൽ വോട്ടിനായി അപേക്ഷ നൽകുകയോ പോളിംഗ് നിയമന ഉത്തരവുമായി വോട്ടർ ഫെസിലിറ്റേഷൻ സെന്ററിൽ ഹാജരാവുകയോ വേണം. നിലവിൽ തപാൽ വോട്ടിനായി അപേക്ഷ നൽകിയവരും അവരവർക്ക് വോട്ടവകാശമുള്ള വോട്ടർ ഫെസിലിറ്റേഷൻ സെന്ററിൽ ഹാജരായാൽ മതി.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |